Бии беләсеңме

Бии беләсеңме
10нчы балалар бакчасында район күләмендә “Үкчәкәй” бию конкурсы булды. Авыллардан да килгән иделәр. Конкурсны 10нчы бакчаның музыка белгече Лилия Харитонова алып барды.
Биюдә иң мөһиме нәрсә? Бер очрашкач, Арча сәнгать мәктәбенең тәҗрибәле хореографы Венер Хисамиевка шундый сорау бирдем.
– Бала музыканы тоя белергә тиеш, – диде ул.
Конкурсның жюри рәисе, хореограф Илһамия Гыйлаҗиева кечкенәдән биергә яраткан. Мәктәпне тәмамлагач, әти-әнисенә, биючелеккә укырга барам, дигән. Гомерләрен авылда хезмәт белән үткәргән әти-әни кызларын аңлый алмаган. Ничек инде гомерне биеп үткәрергә кирәк?! Ә кыз үзенекен иткән. Культура-агарту училищесына укырга кереп кайткан. Һәм әти-әнисенә куркып тормаган, бу турыда әйткән. Ата-ана кызларын... кочаклап алган һәм: “Дөрес эшләгәнсең, кызым, үз юлыңнан тайпылма”, – дигән. Илһамия ханым үз һөнәренә тугры булып кала, гаилә дә кора, балалар да үстерә.
– Мәктәпкәчә яшьтәге балаларның бию конкурсына сөенеп килдем, – дип сөйләде ул. – Сабыйларның бер-берсен уздырып биюләрен күреп, күз яшьләрем чыкты, горурланып утырдым. Бу конкурсны бакча эчендә генә калдырмыйча, район Мәдәният сәхнәсенә чыгарырга кирәк. Безнең нинди нәни биючеләребез барын тамашачы да күрсен. Балалар да кыюлана һәм остарачак. Мин үзем өстенлекне халык биюләренә бирәм. 4нче балалар бакчасыннан “Асылъяр”, Апаз мәктәбеннән “Мәрҗәннәр” коллективлары татар халык биюен бик матур башкарды. Яңа Кенәр бакчасы балаларының мари халык биюен яратып карадым. Рус халык көйләренә моряклар биюен ике коллектив (10нчы һәм 5нче бакчалар) биесә дә, һәркайсының үзенчә матур килеп чыкты.
Жюри һәр коллективның чыгышын югары бәяләде һәм иң җылы сүзләр белән һәркайсына бүләк тапшырды. Шулай ук Арчаның 8нче бакчасыннан Алинә Садыйкова белән Искәндәр Алеев дуэтын, 9нчы бакчадан “Энҗе бөртекләре” камка биюен, 1нче бакчадан Эльза Сөләйманованың, Сикертән бакчасыннан Гөлфия Шәфыйкованың һинд биюләрен, 2нче бакчадан Камилә Маликованың татар халык биюен яратып карадык.
Биергә яратмаган бала юктыр ул. Нәни вакыттан ук алар музыка ишетүгә кылана башлый. Менә шул хәрәкәтләрне тагын да үстерәсе, биюгә әйләндерәсе иде. Ә бии белү ул кешегә гомер буе кирәк. Бу сәламәтлек. Һәм кеше арасында матур итеп бию – үзе бер бәхет бит ул! Эх, җилкенеп бер биеп алуга ни җитә?!
Бию түгәрәкләре барлык бакчаларда да эшләсен иде ул.
Румия Надршина