Яхшы кәеф

Яхшы кәеф
Арча үзәгендәге мәйданда флешмоб-батл булды.
Безнеңчә, гади итеп әйтсәк, бер төркем яшьләр (300ләп) мәйданны тутырып 1 сәгать буе биеделәр дә, ай күрде кояш алды дигәндәй, таралышты. Ул спорт-мәдәни, наркотикларга каршы марафон иде. Мәктәпләрдән, уку йортларыннан килгән 33 команда ярышты. Анда район башкарма комитеты җитәкчесе Илшат Нуриев катнашты. Ул, яшьләрне сәламләп, Җиңү көне белән котлады.
Марафонны яшьләрнең “Форпост” үзәге җитәкчесе Руслан Сафин алып барды. Башта командалар, татар, рус, чит телләрдәге көйләргә биеп, үзләре белән таныштырды. Аннан китте күмәк бию. Дәртле көйләргә сәгать буе бер дә туктамый биеделәр. Хәлләрен сорашам.
Кушлавыч мәктәбеннән 8 сыйныф укучысы Гөлназ Әхмәдуллина:
– Кәеф шәп! Ярый килгәнбез әле. Мондый кызыклыкны, рәхәтлекне кайчан күрер идек?!
Лесхоз мәктәбенең 8 сыйныф укучысы Гүзәл Зиннәтуллина:
– Ачык һавада биюе үзе бер рәхәт, кояш кыздырыпмы кыздыра, ә без биибез!
Урта Курса мәктәбенең оештыручы-педагогы Илмира Солтанова:
– Мондый зур марафонда беренче тапкыр катнашабыз. Киемне мәгънәле булсын, дип сайладык. Безнең яшел футболкалар милли төстә, муеннардагы галстукта Татарстан флагы төсләре. Авыл балалары оялчанрак. Зур чараларга балаларны күбрәк алып чыгарга кирәк.
Апаз мәктәбенең тәрбия эшләре буенча директор урынбасары Алсу Якуповадан:
– Бигрәк тә кайсы команда биюе ошады? – дип сорыйм.
– Үзебезнеке ошады, – дип елмая ул. – Мәктәптә иң актив 10 сыйныф укучыларын алып килдек. Монда да аерылып торды алар.
Кушлавыч мәктәбенең татар теле һәм сәнгать укытучысы Нурзилә Бикчәнтәева:
– Безнең команданың исеме “Тукай оныклары”. Футболкаларны да Г. Тукай сүрәте төшерелгәнен кидек. “Бәйрәм бүген” көенә биедек. Мондый күмәк чараларда балаларның күңелләре күтәрелә, кыюлана төшәләр. Татар көйләренә өстенлек күбрәк булсын иде. Дәртле, биетә торган бик матур көйләребез бар бит безнең.
Ниһаять, нәтиҗәләрне белер чак җитте. Лесхоз мәктәбе командасы 1нче урынга лаек булды. Хореограф Зөлфия Кочурова:
– Марафонга бер атна әзерләндек. Музыканың мәгънәлесен сайладык. Анда татар көе дә, хәрби тема да һәм Казанда үткән универсиада гимны да бар. Безнең балалар бер-берсен аңлап, тоеп биеде.
2нче урында – Арчаның 1нче мәктәбе, 5нче гимназия командалары. 3нче урында – Социаль Мәгариф Академиясе, Арчаның агросәнәгать һөнәр коллияте командалары. Арча педагогика көллияте командасы (җитәкчесе Лилия Маликова) Гран-при алуга иреште. Иң дәртле биючеләр, минемчә, алар иде.
Флешмобта иң мөһиме – яхшы кәеф. Начар гадәтләргә бирешми торган, алга, җиңүгә омтылыш кәефе ул!
Румия Надршина