Әйдәгез, бергәләп булышыйк

Әйдәгез, бергәләп булышыйк
Бәла аяк астында, диләр. Ашытбаш авылында да 8 майда бөтен кеше бәйрәм рухы белән яшәп ятканда шундый хәл килеп чыгар, дип кем уйлаган?
— Митингны матур гына тәмамлап, туганнар белән зиратка барырга җыенып йөргәндә: “Ашытбашта янгын!” — дигән хәбәр килде, — ди Ташкичү авыл җирлеге башлыгы Фәһим Фәйзуллин. — Өч йорт янды, бер авыл өчен күбрәк булды шул.
Янгын ялмап үткәннән соңгы күренеш бигрәк шомлы. Без килгәндә күп әйбер җыештырылган иде инде. Авылдашлары, туганнары, дуслары өмәгә чыккан, барысы җиде техника эшләгән.
Сәрия һәм Нәкыйп Сираҗиевларның лапаслары янган, өйләрен саклап калганнар. Ашытбашның ир–егетләре 5–6 помпа белән су сиптереп торганнар.
— Веранда, өйнең бер почмагы көйри башлаган иде, — ди Сәрия. Кайнанам: “Әй, Аллам, өйне генә булса да калдыр инде”, — дип ялварды, шуннан җил борылып китмәсенме!
Нәкыйп — әфган сугышын кичергән кеше, сәламәтлеге какшау булуга карамастан, “Мәрҗани” ширкәтендә терлекләр карый. “Төне буе аяклары сызлаудан газаплана”, — ди Сәрия. Чүп өстенә чүмәлә, дигәндәй, менә бу янгыны тагын...
Берничә кеше сарай төзергә керешкән, имән баганалар утыртып куйганнар. “Мәрҗани” ширкәте төзүчеләре икән. Җитәкче Марат Минәчетдинов хәлләрен белеп тора.
— Калай белән әйләндереп алырга иде инде сарайны, — ди Сәрия. — Түбә калаена гына 40 мең сум кирәк, диләр. Барысы 80 мең тирәсенә төшәр инде.
Сыер белән таналарын сеңелләренә урнаштырганнар, сыерлары шушы айда бозаулыйсы икән...
Күршеләрендәге тулысынча янып беткән хуҗалык — 90 яшьлек Кадрия әбинеке. Йортлары ике ел буш тора, Акчишмәдәге кызында яши. Ире Абдулла абый Заһидуллин Ташкичү авыл Советы рәисе булып эшләгән иде.
Аннан соңгы йорт Иңгел Сәйфетдиновныкы булган. “Йорт– җирләре таза иде”, — ди авыл җирлеге башлыгы. Хәзер йорт урынында кирпеч өемнәре генә калган. Бакча башындагы вагоннан Иңгел үзе дә килеп чыкты. 1997 елда комбайнда рекордлы ашлык суктырып, “5ле” модельле “Жигули” белән бүләкләнгән кеше бу. Малае Айдар ярдәмчесе булган. Хәзерге вакытта “Акчишмә” ширкәтендә эшләп йөри, пенсиягә чыгарга ике елы бар. Гомерең буе казган да, минутлар эчендә бернәрсәсез кал инде...
— Өч йорт, дүрт хуҗалыкның сарайлары 20 минут эчендә юкка чыкты, — дип сүзгә кушыла Фәһим Фәйзуллин.
— Бу көнне мин хастаханәдә идем, — ди Иңгел. — Кайткач, трактор белән бакча сукаларга булдым. Ике–өч кенә әйләндем — менә бу як күршенең лапасыннан төтен чыга башлады. Сыер белән бозауны алып чыгып өлгердек, тананы да алып чыккан идек, тик ул бәрелеп–сугылып утка кереп китте. Тавык- лар да янган дип уйлаган идек, алар бер хуҗалык лапасына кереп кунаклаган булганнар икән...
Лапасында ут чыккан йортта Һәвәрия Сәлимҗанова яшәгән. Ул, әнисен карап, соңгы юлга озаткан, шунда торып калган. Энесе Сәүбән кайткалап йөргән, умарталары бар. Әлеге хәвефле көнне ул Иңгел белән бакча сукаларга чыккан булган. Ут ничек чыккан — монысы әлегә сер булып кала, тикшерү нәрсә күрсәтер...
Безнең халык элек–электән бер–берсенә ярдәмгә килгән. Әлеге янгында зыян күрүчеләргә дә беренче көннәрдән үк кулдан килгәнчә булышырга тырышалар. Район башкарма комитеты җитәкчесе Илшат Нуриев, янгын вакытында ук авылга килеп, тиешле күрсәтмәләр бирде, аннан соң да мәсьәләне көндәлек контрольдә тота. Авыл җирлеге башлыгы Фәһим Фәйзуллин Ашытбаштан кайтып керми диярлек. Бүгенге көндә бөтенләй яшәү урынсыз калган Сәйфетдиновларны урнаштыру өчен төрле вариантлар эзлиләр.
Хөрмәтле райондашлар! Без дә кеше хәсрәтенә битараф булмыйк. Түбәндә Ашытбашта янгыннан зыян күрүчеләргә акча күчерү өчен исәп–хисап счетын күрсәтәбез.
Реквизиты для перечисления средств:
Арский районный об- щественный благотворительный фонд “От сердца к сердцу”
№ счета: 40703810207020000119
БИК: 049205805
К\счет: 30101810000000000805
ИНН 1609011794
КПП160901001
Арский филиал “Ак Барс” банка
Адрес фонда: г.Арск, Советская пл., д.12.
Назначение платежа: добровольное пожертвование на уставную деятельность (для пострадавших на пожаре в с. Ашитбаш), НДС нет.
Ильяс ФӘТТАХОВ