Уңышларыбыз күз алдында

Уңышларыбыз күз алдында
Татарстан Республикасы 2014 елда төбәк башкарма власте органнары эшчәнлегенең нәтиҗәлелеге буенча бишенче тапкыр рәттән беренче урынны алды. Россия Федерациясе Хөкүмәтенең рейтинг нәтиҗәләрен игълан иткән утырышы 2015 елның 7 маенда үтте.
Нәтиҗәлелекне бәяләүнең төп күрсәткече булып төбәкнең икътисад һәм социаль өлкәләрдәге үсеш динамикасы, шулай ук халыкның башкарма власть органнары эшчәнлегенә биргән бәясе тора. Бәяләү соңгы өч елдагы 11 күрсәткеч буенча үткәрелә. Шулай итеп, Татарстан югары күрсәткечләрне саклап кына калмый, ә барлык социаль–икътисадый юнәлешләр буенча омтылышлы үсеш күрсәтә.
Татарстан Республикасы Президенты Рөстәм Миңнехановның стратегиясе республиканың тотрыклылыгын һәм үсешен тәэмин итә. Соңгы биш елда Татарстан иң мөһим социаль–икътисадый күрсәткечләр буенча лидерлык позициясен ныгытып, монда эре инновацион проектлар киң үсеш ала.
Республика уңышларына безнең Арча районы да лаеклы өлеш кертә.
— Без районга күрсәткән ярдәме өчен республика Президенты Рөстәм Миңнехановка бик рәхмәтле, — ди район башкарма комитеты җитәкчесенең беренче урынбасары Илшат Галимуллин. — Республика программаларының мөһим өлеше булган төзелеш бөтен район тормышына җан өрә, үз артыннан башка күп тармакларны әйдәп, күп кенә социаль мәсьәләләрне хәл итә.
2014 елда бу өлкәдә 1 млрд. 200 млн. сум капитал салынды. 953 млн. сумлык төзү–монтаж эшләре башкарылды. Пландагы 27 мең кв.м урынына 30,2 мең кв.м торак төзелеп тапшырылды.
Узган ел районда социаль ипотека, авылда торак төзелеше һ.б. программалар буенча актив эш алып барылды. Күп фатирлы йортларны төзекләндерү дәвам итә. Программа эшли башлаганнан бирле 180 млн. сумга 74 йорт яңартылды, быел 8 йорт ныклап төзекләндерелә, 16,8 млн. сумлык төзекләндерү эшләре башкарылачак.
Районда социаль объектлар төзү һәм төзекләндерүгә зур игътибар бирелә. 2014 елда 4 мәктәп төзекләндерелде. Арчаның көньяк өлешендә 260 урынлы балалар бакчасы, Боз сарае төзелеп, файдалануга тапшырылды. Айван һәм Наласа авылларында яңа фельдшер–акушерлык пунктлары, 6 яңа спорт мәйданчыгы куелды. “Чиста су” программасы буенча 10 млн. сумлык эш башкарылды.
Кыенлыкларга карамастан, 2015 елда да төзү эшләре күләмнәре кимеми. Арчаның 3нче мәктәбе базасында, элеккеге 6нчы мәктәп бинасында, Үрнәктә, Мөндеш авылында балалар бакчалары төзелә.
Районда ел саен зур күләмдә юл төзү һәм ремонтлау эшләре башкарыла. 2015 елда Наласа, Иске Муй, Кече Төрнәле, Иске Ашыт авылларына керү юлларын төзү, Арча–Әтнә, Арча–Теләче юлларында ремонт эшләре планлаштырыла. Арча шәһәрендә 9 урамга асфальт түшәләчәк.
Республика программалары авылларыбызның йөзен үзгәртте.
— Безнең Иске Кырлай авыл җирлегенә кергән Мөндеш авылы халкы биг-рәк тә бәхетле, — ди авыл җирлеге башлыгы Фәргать Сираҗетдинов. — Күптән түгел генә яңа фельдшер–акушерлык пункты ачылган иде. Быел менә 50 урынлы, спорт залына кадәр булган балалар бакчасы төзелеп килә. Бик начар хәлдәге баракларда яшәгән 7 гаилә яңа фатирлар алачак. Иске Иябаш авылында якындагы көннәрдә яңа клуб ачылачак.
Район башкарма комитеты җитәкчесе Илшат Нуриев быел республикадан сәнгать мәктәбен ныклап төзекләндерү өчен 20 млн. сум өстәмә акча бирелүен әйтте. Шулай ук районның үзәк хастаханәсен ремонтлау дәвам итәчәк. Шәһәрнең көнбатыш өлешендә яңа мәктәп салу мәсьәләсе дә көн тәртибенә килеп басты.
Ильяс ФӘТТАХОВ