ЧӘЧҮЕ БЕТКӘННӘР ЕЛМАЕП ЙӨРИ

ЧӘЧҮЕ БЕТКӘННӘР ЕЛМАЕП ЙӨРИ
Урман болытны үзенә тарта, дигән әйтем бар. Чыннан да, шулайдырмы, әмма узган шимбәдә Үрнәк авыл җирлегенә кергән авылларның табигый казага тарулары хак.
— Төштән соң ике сәгать боз катыш яңгыр койды, — ди авыл җирлеге башлыгы Илгиз Камалетдинов. — Үрнәк бистәсенә бигрәк тә көчлесе эләкте, урамнардан язын күрмәгән ташу акты, бакчаларны юды, өй асларына, базларга тулды.
Ә болай көтеп алган яңгыр булды инде ул. Арча метеостанциясе зонасына кергән урыннарда 16 мм яңгыр яуган. Шушмабаш, Апаз, Ашытбаш якларында да бик әйбәт яуды, дигән хәбәрләр алдык.
— Яңгырдан соң көннәрнең салкынча торуы да әйбәт — туфракта кабык барлыкка килмәде, — ди район авыл хуҗалыгы һәм азык–төлек идарәсенең үсемлекчелек бүлеге җитәкчесе Миннәхмәт Сәгыйтьҗанов.
Шифалы яңгырлардан соң сабан культуралары басулары күзгә күренеп яшел төс ала. Быел күп- ләр туфракның әйбәт килүенә игътибар итә, кәс юк диярлек. Табигать тә иренмәгез генә, миннән торганы эшләнер, дия кебек. “Курса МТСы”, “Ватан”, “Северный” , “Татарстан”, “Кырлай”, “Игенче”, “Аю” ширкәтләрендә, мәкальдә әйтелгәнчә, сабанда сайрашып эшләделәр. “Арча”, “Мәрҗани” ширкәтләрендә нык тырышлык сорала әле.
Язын һәр хуҗалыкта басулар яшел була, кемнең ничек эшләгәне соңрак, чүп үләннәр калыккач, чи җирләр күренә башлагач күренә. Басу культурасы турында нәкъ менә бүген кайгыртырга кирәк. Моның ачык мисалын “Ак барс” агрокомплексы” ширкәтендә күрдек. Легендар тракторчы Зәкәрия Динмөхәммәтов “ДТ–75” тракторы белән багана төпләрен дә калдырмыйча чәчеп йөри. Аның кебек тагын кем бар икән?” — дип аптырап карап тордык. “Быел аның тракторда эшли башлавына 50 ел. Елның 365 көнендә тракторын кабызмый калган көне юк”, — ди баш агроном Рөстәм Мөхәммәдиев.
Ильяс Сәхәпов