50 ЕЛ БЕРГӘ

50 ЕЛ БЕРГӘ
50 ел бергә гомер иттегез, Авыр елларны бергә үттегез... Нәкъ җырдагыча, елларның авыр чаклары эләгә аларның яшьлегенә. Тик мәхәббәт, хөрмәт, ышаныч дигән бөек хисләр авырлыклар алдында сыгылып төшмичә, бүгенге көнгә кадәр илтә. Яшьлек туйларын бәйрәм итү насыйп булгандырмы, юктырмы, ләкин иң матурын – гомерләренең алтын туйларын алар район күләмендә билгеләп үтте.
Район ЗАГС бинасында алтын туй ияләрен тантаналы рәвештә Дан китабына кул куярга дәшү, яшьлек хатирәләрен яңартып Мендельсон маршы астында узу гадәте инде традициягә әйләнеп китте. Затлы келәмнәр өстеннән залга шушы көннәрдә Орнашбаштан Клара һәм Рәдиф Касыймовлар, Арчадан Венера һәм Ягъфәр Шәмиевлар, Нурия һәм Илдар Абдуллиннар үтте.
Пар канатлы булып ярты гасыр гомер итү – сирәкләргә генә тия торган олы бәхет, Аллаһы Тәгаләдән бирелгән бүләк ул. Тормыш мәшәкатьләре артта калган, балалар урнашкан, хәзер яшьлек хатирәләрен яңартып, ирешкән үрләргә, гомернең заяга узмавына сөенеп яшисе дә яшисе.
Гаилә – кеше изгелек кылырга өйрәнергә тиешле тирәлек, дигән В.Сухомлинский. Юбилярларыбыз һәммәсе әнә шул гыйбарә буенча яши, үзләренең якты эзләрен киләчәк буынга үрнәк итеп, балаларын да шул рухта тәрбияләгәннәр. Утар Атыда туып-үсеп Арчада гомер иткән Илдар Абдуллин гомерен автотранспорт предприятиесендә машина йөртүче һөнәренә багышлый. Урып–җыю чорында колхозларга ярдәм иткән чакларда бер таңнан икенчесенә кадәр эшләгән вакытлары күп була аның. Тырыш хезмәтнең нәтиҗәсен районның ул чаклардагы Мактау тактасы, Мактау грамоталары, рәхмәт хатлары раслый. Тормыш юлдашы Нурия апа да намуслы хезмәт кешесе. Хезмәт юлын Арча икмәк комбинатыннан башлаган кыз лаеклы ялга почта бүлеге хисапчысы булып чыга. Гаилә бер ул һәм кыз үстереп олы тормыш юлына озата. Бүгенге кичәдә Илдар абыйның Нурия апага багышлап башкарган җырына рәхмәт, ихтирам, ярату хисләре салынган иде.
Һәр гаиләнең үз мәхәббәт тарихы. Гомерләрен яшь буынга белем бирүгә багышлаган Шәмиевлар 1965 елның 30 апреленнән янәшә атлый.
– Венерага бер күрүдә гашыйк булдым, – дип сөйли Ягъфәр абый. – Гашыйк булдым да, очрашуга сәбәп эзли башладым. Чыкты бит җае. Сеңлесе белән бергә эшли идек, телевизор карарга керүне сәбәп иттем (ул чакта телевизорлы кеше сирәк иде). Әти–әнисе белән уртак тел тапкач, кызны чаңгы шуарга, кинога, концертларга дәшә башладым.
3 оныклары, 1 онык- чыклары бар аларның. Олы кызлары Гөлнара табибә һөнәрен сайласа, Диләрәләре үзләре юлыннан киткән.
Рәдиф абый белән Клара апа икесе дә Орнашбашта туып-үсә. 7 сыйныфтан соң ат җигеп төрле эшләрдә эшли башлаган егет икътисадчы дәрәҗәсенә кадәр күтәрелә. “Яши-яши Клара сабыр холыклы булуы, туры сүзен әйтә белүе белән мине тагын да яраттырды. 43 ел килен булып, 12 ел кайнана булып 8 кешелек гаиләне бербөтен итеп саклап, хөкүмәт эшендә намуслы хезмәт итеп яшәве үзе горурлык. Кларам белән узган 52 елның һәрберсе миңа бары шатлык кына китерде”, – ди Рәдиф абый. Алай гына да түгел, аларның горурлыгы – үзләре гомер биргән, бүген инде тормышта үз юлларын тапкан балалары. Ә алар дүртәү!
Кулны-кулга, иңне-иңгә куеп яшәүче парларны котларга балалары, якыннары, шәһәр башкарма комитеты вәкилләре, авыл җирлеге башлыклары да килгән иде. Расих Галимҗанов юбилярларга җырларын бүләк итте.
Розалия Зиннәтова