Рәмис белән Ләйсән ярдәмгә мохтаҗ

Рәмис белән Ләйсән ярдәмгә мохтаҗ
Бала туса, бәхете белән булсын, дибез. Ата–ана өчен бала бәхете, бала сәламәтлегеннән дә зуррак нәрсә юктыр. Авыру балаларын аякка бастыру өчен ихтыяр көчләрен дә, сабырлыкларын да югалтмыйча, бөтен тырышлыкларын, көчләрен куеп, соңгы тиеннәренә кадәр биреп, хастаханәләр юлын таптаган ата–аналарны Аллаһы Тәгалә ярдәменнән ташламасын иде.
Тик, ни кызганыч, бездә хәзер бөтен нәрсә акчага килеп терәлә. Акчаң булса, яхшы хастаханәсе дә, табибы да табыла. Юк икән…Монда тиеннәр белән генә эш итеп булмый, миллионнар кирәк. Бөтен ышаныч кеше кайгысын үзенеке кебек кабул итеп, изгелек эшләргә атлыгып торган шәфкатьле затларда. Андыйлар бик күп һәм тирә–юнебездә генә. Аеруча яшьләр.
Беркөн редакциягә Яңа Кенәрдән Фәния Шәрәфиева килеп керде.
– Бездә 13 яшьлек Рәмис Григорьевка ярдәм йөзеннән хәйрия концерты була. Яшьләр оештыра, – диде ул.
Юлда Фәния ханым белән сөйләшеп кайтабыз.
– Минем улым Рамил Казан аграр университетында 4нче курста укый. Шунда Роберт Галиев җитәкләгән театрда да уйнады. Тамада булып йөри, бии, җырлый, үз коллективы бар, – диде ул. – Беркөн хәйрия концерты турында сүз кузгаттым. Рамил моны шунда ук күтәреп алды, иптәшләренә шалтыратып, 5 минут эчендә мәсьәләне хәл итеп тә куйды. Егетләр берсүзсез ярдәм кулы сузарга карар кылды.
Халык күп җыелган иде. Тамашачыларның теләге–концерт караудан бигрәк, аз булса да, әле яши генә башлаган Рәмискә ярдәм итү.
– Авыру берәүдән дә сорап килми. Бала бит ул. Нинди ананың йөрәге түзсен. Аз гына булса да өлешебез керсен, – диделәр лаеклы ялдагы Рәмзия Йосыпова һәм Миләүшә Сәмигуллина.
– Мәктәп, ата–аналар тарафыннан бу гаиләгә ярдәм күрсәтелә инде, – диде Яңа Кенәр мәктәбе укытучысы Эльмира Әхмәтова. – Аннан укуын да калдырмыйбыз. Укытучылар өенә барып укыталар.
– Якының булмаса да, булышасы килә. Һәр кешегә хас эчке хис, инстинкттыр инде ул, – диде 9нчы сыйныф укучысы Зилә Нигамәтҗанова.
Рәмис Григорьевның әти–әнисе Гөлгенә белән Радик Григорьевлар да концертка килгән иде.
– Авыруы узган ел гына билгеле булды. Яңа Кенәр хастаханәсе баш табибы Рафия Аксакова Казанга җибәрде. 9 ай хастаханәдә ятты. Апрельдә генә кайттык. Хәзер атна саен анализлар бирәбез, – диде Гөлгенә барлык матди ярдәм күрсәтүче хезмәттәшләренә, авылдашларына, Казаннан ук кайтып хәйрия концерты оештырган Рамил Шәрәфиев, Артур Сабиров, Алмаз Әхмәтов, Миләүшә Сәйфуллина, Фәннур Фатыйхов, Дамир Галиәкбәров, Дамир Зиннәтуллин, Яңа Кенәр үзешчәннәре Ләйсән Хәкимова җитәкчелегендәге “Ләйсән” бию коллективына, Алсу Сәмигуллинага мең–мең рәхмәтләрен җиткерде. (ярдәм күрсәтергә теләүчеләр булса, телефоннары 89179085609).
Ярдәмчел кешеләр күп бездә. Арчада яшәүче Ләйсән Ситдыйкова турында ишеткәч, аны белгәннәр, хәтта белмәгәннәр дә кызга ярдәмгә ашыкты.
– Без аның белән бер мәктәптә укыдык. Шундый тырыш, актив кыз, биюче, медицина көллиятенә укырга керде. Һәм кинәт авырып китте. Яши генә башлады бит әле. Без, Арча яшьләре, моның белән килешергә теләмәдек, – ди Илүзә Галимуллина. – Аз булса да файдабыз тиюенә сөенәбез.
Моннан тыш Арча Укучылар сарае, Арча сәнгать мәктәбе, педагогика көллияте, станциядәге мәдәни-спорт үзәге, волонтерлар концерт, көллият каршындагы “Яшьлек” театр студиясе спектакль куйды, 28 майда Татарстан эстрада йолдызларының Арчада хәйрия концерты була.
Ләйсәннең әти-әнисесе белән элемтәгә керә алмадык. Алар Төркиядә хастаханәдә булып чыкты.
– Ләйсәнне дәвалар өчен 6 миллион сум кирәк. 2 миллион 300 мең сум акча җыелды инде, – диде энесе Гаяз. – Артык көтәргә ярамый, соң булачак, калган сумманы аннары түләрсез, диделәр.
Тагын 3 миллион 700 мең сум акча җыярга кирәк. Ләйсән бүген шәфкатьле, изге күңеллеләр ярдәменә мохтаҗ. Тиеннәрдән сумнар җыела. Әйдәгез, Ләйсәнгә ярдәм итик.
Билайн 89053159815; Саклык банкы картасы 676196000306484917 д 01/18; Qiwi–кошелек +79274347186; Саклык банкында исәп–хисап счеты 42307.810.4.6200.0287191 (8610/0115 номерлы бүлекчәдә Габделфәт Габделхакович Ситдыйков исеменә).
Гөлсинә Зәкиева