Акчасы булса, файдаланырга урыны табыла

Акчасы булса, файдаланырга урыны табыла
Кайчандыр тормыш юлын гомергә бергә үтәргә телдән дә, язмача да вәгъдә биргән парлар бу юлы ЗАГС бинасына мәхәббәт җимешләре – балалары белән килгән иде. Аларга биредә тантаналы шартларда ана капиталына сертификат тапшырылды.
Тантаналы чараны Арча һәм Әтнә районнары буенча Пенсия фонды идарәсе җитәкчесе Рузия Нурмөхәммәтова ачты.
– Ана капиталын өч төрле юнәлештә – торак шартларын яхшырту, балаларның укуы һәм ананың булачак пенсиясен арттыру өчен кулланырга була. 256нчы закон нигезендә башта аны балага өч яшь тулгач кына алырга мөмкин иде. 2009 елдан башлап, балага ничә яшь булуга карамастан, бу сумманы торак төзү яки торак сатып алу өчен алынган кредитны (шулай ук ипотека кредитын) түләргә кулланырга мөмкин, – диде ул, ана капиталы куллануның төп юнәлешләре белән тагын бер кат таныштырып. – 241нче Федераль закон нигезендә йортны үз көче белән төзегән яки зурайткан очракта гаилә башта ана капиталының 50 процентын, ә төзелеш төгәлләнгәннән соң, беренче яртысын алганнан соң 6 ай узгач, калганын файдалана ала. Моның өчен йорт төзелә торган җирне сертификат хуҗасы яки аның тормыш иптәше исеменә рәсмиләштерергә, аннары район башкарма комитетыннан йорт төзергә яки зурайтырга рөхсәт итүче документ алырга кирәк. Моннан тыш төзелешкә рөхсәт алган кеше йортның кадастр планын эшләткәннән соң 6 ай эчендә аны гаилә әгъзаларының барысы исеменә (балаларны да кертеп) гомуми милек итеп теркәтәчәге турында язмача йөкләмә алырга бурычлы. Шушы документлар эшләнгәч, Пенсия фондына мөрәҗәгать итәргә кирәк.
Ана капиталына сертификат 2007 елдан соң туган икенче, өченче яки аннан соңгы балалар өчен бирелә. Арча районында аны алучылар саны 2773кә җиткән. Суммасы да 250 мең сумнан башланса, бүгенге көндә индексацияләнеп, 453026 сум булган. “Балага 3 яшь тулганчы ана капиталы акчасы алып, торак шартларын яхшыртырга теләүчеләр Россельхозбанк, Саклык банкы, Автоградбанк, “Ак барс” банк һәм Татфондбанк белән эшли. Автоградбанк белән Саклык банкы вәкилләре сертификат тапшыру тантаналарында иганәче буларак та катнаша”, – ди Рузия Нурмөхәммәтова. Бу юлы да Саклык банкының Арчадагы өстәмә офисы җитәкчесе урынбасары Алевтина Мухина килгән иде. Ул тантанада катнашкан гаиләләр әгъзаларын ана капиталы акчасын алу тәртибе белән таныштырды, сертификат ияләренә истәлекле бүләкләр тапшырды.
Бу көнне ана капиталы сертификатын Штерәдән Лилия Гайфуллина, Түбән Атыдан Гүзәл Әхмәтвәлиева, Арчадан Рәзилә Хәйруллина, Лилия Муравчикова, Гөлгенә Сабирова, Чулпан Сабирова алды.
Пенсия фонды идарәсенең клиентларга хезмәт күрсәтү бүлеге баш белгече Гөлгенә Сабирова күпләргә таныш. Хәзерге вакытта ул өченче баласы белән дек-рет ялында. Бәхетле ана тантанага 13, 9 яшьлек өлкән балалары һәм әнисе Дания апа белән килгән иде.
– Йорт төзибез. Ана капиталын шуңа файдаланабыз, – ди 2 айлык нәниен күкрәгенә кысып Гөлгенә.
Гөлсинә Зәкиева