Сәләтеңне үстермәсәң — югала

Сәләтеңне үстермәсәң — югала
“Бу егет кебек талантлыларның тренеры була алырмынмы тагын? Мондыйлар булмас инде...” — диде Хәйдәр Зәйнуллин укучысы Айнур Зиннуров белән таныштырганда.
Айнурның беренче тапкыр шашка түгәрәгенә килгән чагын сөйләп китте: “Мин Арчаның 4нче мәктәбендә укыта идем, Айнур башлангыч сыйныфларда укый. Берәр көн кызыксынып килеп карап утырды да, үзен өйрәтүемне сорады. Шулкадәр үҗәтлек белән өйрәнде ул, кайчакларда кичкә кадәр уйнап утыра идек. Хәзер менә үзе мине өйрәтә”.
Айнурның, чыннан да, тренерын кайбер нечкәлекләргә өйрәтерлеге дә бар. Ул, ике ел элек Бөтенроссия күләмендәге ярышларда 1нче урынны алып, спорт остасы кандидаты нормативларын үтәде, ә узган ел Татарстан чемпионы булды, Татарстанның җыелма командасы составында Чиләбедә үткән Бөтенроссия ярышларында 3 урынны яулады. Аның уңышларын санап бетерерлек түгел! Республика ярышларында алдынгы урыннар яулаучы, теннис буенча район призчысы, дартс буенча 1 урын... “Айның өчтән бер өлешен ярышларда уздырам”, — ди. Ә уку? “Тырышам инде, кайткач көн–төн укыйм. Рәхмәт мәктәп җитәкчелегенә, миңа ярышларга барырга мөмкинлек тудыралар. Ә иң зур рәхмәтем — Хәйдәр абыйга. Әгәр ул этәргеч бирмәсә, бу уңышларга ирешә алмаган булыр идем”.
Спортның бар төре аның өчен “теш үтәрлек”. Әллә ничә төре белән шөгыльләнә: теннис, баскетбол, волейбол, чаңгы, йөгерү, дартс... Шашка буенча тәүге зур уңыш 10 яшендә килә Айнурга. Район күләмендәге ярышта өченче була ул. Шуннан китә инде: һәр ярышта чемпион. Әз генә җае чыктымы, шашка турында язылган китапларга чума. “Шашка уены уйнап карамаганда гына җиңел кебек күренә. Ә берничә йөрештән соң вариантлар күбәя. Шуңа күрә китап укып нечкәлекләрен өйрәнмичә булмый, сәләтеңне үстермәсәң — югала ул, — ди. — Элек “Колос” мәдәният йортында “Шашка һәркем өчен” дигән китап бар иде. Мин ул китаптагы һәр мәсьәләне чишеп чыктым. Аннан Хәйдәр абый Казанга Рәшит Нәҗметдиновның шашка–шахмат клубына алып барды. Аннан тагын да канатланып кайттым”.
Уенда гел спорт кына түгел егетнең. Укуда да алдынгылыкны бирми икән. Бирсә дә бирә бит сәләтне кешегә! 2012–2013 уку елыннан башлап Айнур төгәл фәннәрне дә, телне дә яхшы үзләштереп район олимпиадаларында да гел алдынгы урыннарны алып килә. Күптән түгел педагогика көллиятендә экология буенча район күләмендә узган “Фән һәм без” фәнни конференциясендә 1 урынга лаек булган.
— Олимпиадаларга җәй айларында әзерләнәм мин, – ди сигезенчедә укыганда ук кызыксынып БДИ тестларын чишкән егет. Яшьтәшләренә дә киңәше бар: “Имтиханнарга кадәр әле вакыт бар, укырга, әзерләнергә кирәк. Һәм югары белем алуга омтылырга”, — ди.
Олимпиада дигәннән, беренче тапкыр катнашуы 4нче сыйныфта укыганда була аның. Укытучысы математика фәненә мәхәббәт уяткач, күңелен гел шул фәнгә багышлап яши башлый. Беренче призлы урын алган елы 7 дә укыганда була. 6 балалы гаиләдә абый–апалары янында әвәрә килеп үскән егет 5 яшендә алфавитны һәм тапкыр- лау таблицасын өйрәнә. Берчак күңелен мәктәпкә барасы килү уе җилкетә башлый. Әнә шулай итеп 6 яше тулар–тулмас укырга керә ул. Инде Арчаның 2нче мәктәбе белән саубуллашыр көннәре дә кул сузымында гына.
Гел уйлануга, фикерләүгә генә корылган зиһеннең хыялларга бирелеп алырга да җае чыга кайчак. Ә хыяллар офыктагы алсу шәфәкъ сыман ымсындырып тора, гел алга әйди. Табиб булырга укырга керү һәм шашка буенча спорт остасы булу.
Розалия Зиннәтова