Кунаклар Арчада

Кунаклар Арчада
Казанда барган өченче Бөтендөнья татар хатын-кызлары форумында катнашучылар безнең Арча төбәгендә дә булып китте.
– Казанга һәм шушы форумга өченче тапкыр килүем, – ди Финляндиядән журналист Айла Амбайрак. – Ә Тукай яшәгән төбәктә беренче тапкыр. Бик күрәсем килгән иде. Без, Финляндиядә яшәүче татарлар, телебезне саклап калу буенча зур эш алып барабыз. Татар һәм дини мәктәпләр бар, “Яз” курслары эшли.
– Ә мин Татарстанда ел да диярлек булам. Татар-башкорт үзәге рәисе вазыйфаларын башкаручы буларак, татар балаларын Бөреледәге лагерьга алып киләм, “Язгы моңнар” татар халык ансамблен җитәклим, – ди Казахстаннан Эльвира Хәбибуллина.
– Татар телен Интернеттагы махсус курс буенча өйрәндем. Онытмас өчен шигырьләр ятлыйм, җырлар башкарам. Ирем Динар да җырчы. 2014 елда “Татар моңы” бәйгесендә җиңү яулады, – ди Санкт–Петербургтан Рената Байтемирова. – Ә мин Мәскәүдә үткән “Татар кызы” бәйгесендә катнашкан барлык 20 татар кызының кураторы булдым. Сүз уңаеннан, Татарстан Республикасының Санкт– Петербургтагы даими вәкиле Шамил Шәяхмәтов сезнең Арча ягыннан.
Киев татар җәмгыяте рәисе Римма Гыйз- зәтуллина безнең газета белән бәйле кызыклы мәгълүмат җиткерде.
– Без, татарлар, бергә ярдәмләшеп яшибез. Якташларыбызның даими хәлләрен белеп торабыз, – диде ул. – Беләсезме, 30нчы елларда Арча районында “Колхозга” газетасында эшләгән Мансура Ганиева сезнең районның Сеҗе авылыннан. Мансура Муса Җәлил турындагы үзенең язмасын аның үзенә җибәргән булган. Арчага килгәндә шагыйрь Муса Җәлил аның белән танышу өчен редакциягә кергән (шагыйрь, чыннан да, Арчада командировкада булган, бу хакта үзенең бер хатында язган). Ул өлкән яшьтәге ханымны күрермен дип уйлаган. Каршына гади генә киенгән, 14 яшьлек кыз бала килеп баскач, аптырап калган. 16 яше тулгач, Муса Җәлил Мансурага Мәскәүдә беренче ачылган коммунистик журналистика институтына юллама биргән. Сугыштан соң Мансура Ганиева Киевта яши. Гомер буе татар акценты белән сөйләште. Пенсиягә чыккач та 20 ел Киев журналистика институтында укытты. 95 яшендә вафат булды. Шулай ук композитор Фәрит Яруллинның кызы Наилә дә Киевта яши. Аның да хәлен белеп торабыз.
Шундый дәрәҗәле форум делегатлары арасында Арчадан Факия Шәрәфетдинова белән Халидә Фәйзрахманованы күрү горурлык уятты. Алар алган тәэсирләре белән бик теләп уртаклашты.
Кунаклар Арча педагогика көллиятендә булды, “Әлифба” музеен карады, “Тылсым” курчак театры, “Оста куллар” күргәзмәсе, “Халкымның күңел бизәкләре” остаханәсе эше, “Гөлстан” әйдәманнар клубы эшчәнлеге белән танышты, актлар залында студентлар көче белән куелган концерт карады. Аларны район башкарма комитеты җитәкчесе урынбасары Илнур Котдусов, педагогика көллияте җитәкчесе Гөлнара Гарипова сәламләде. Соңыннан кунаклар Яңа Кырлайга Габдулла Тукай әдәби музей комплексына юл алды.
Гөлсинә Зәкиева