Кандидатларны сайлаучылар бәяли

Кандидатларны сайлаучылар бәяли
12 майда иҗтимагый оешмалар Президент праймеризында катнашу өчен кандидатлар күрсәтүгә старт бирелү турында игълан иттеләр.
Аннан соң берничә иҗтимагый оешма Татарстан Республикасы Президенты вазыйфасына республиканың хәзерге лидеры Рөстәм Нургали улы Миңнехановны күрсәтү турында карар кабул итте.
Җәмәгатьчеләр республиканың омтылышлы үсеше һәм Татарстанның лидерлык күрсәткечләре нигездә Рөстәм Миңнеханов хезмәте икәнлеген билгеләп үтәләр. Шулай итеп, иҗтимагый оешмалар Рөстәм Миңнехановка ышаныч күрсәтәләр, аның республиканы үстерүгә юнәлдерелгән стратегия- сен хуплыйлар.
Кандидатларны күрсәтү 13 майдан 5 июньгә кадәр дәвам итәчәк. Кандидатларны “Бердәм Россия” партиясе белән хезмәттәшлек итү турында килешү төзегән иҗтимагый оешмалар күрсәтә ала. Шулай ук праймеризда үз-үзен күрсәтүчеләр дә катнашырга мөмкин.
Татарстан югары хезмәт башкаручы зат вазыйфасына кандидат күрсәтү өчен партия эчендә алдан тавыш бирүне оештыручы җәмәгатьчеләр булган беренче регион булды.
Праймериз (инглизчәдән, башлангыч сайлаулар дигәнне аңлата) – сәяси партиядән бердәм кандидат сайлана торган сайлау төре. Аннан соң сайланган кандидатлар арасында гадәти тавыш бирү үткәрелә. Праймеризның мәгънәсе бер партиядән булган кандидатларның төп сайлауларда бер–берсенең тавышларын “тартып алуына” юл куймауда.
Праймериз АКШта еш, башка илләрдә сирәгрәк кулланыла.
2007 елда “Бердәм Россия” партиясе Россиядә беренче тапкыр эчке партия праймеризы үткәрде. Партиянең Татарстан төбәк бүлегендә партия эчендә алдан тавыш бирү беренче тапкыр 2011 елда Россия Федерациясе Дәүләт Думасына сайлау кампаниясе вакытында кулланылды. 2014 елның апрелендә Татарстан Республикасы Дәүләт Советы депутатларын сайлаулар алдыннан үткәрелде.
Партия эчендә алдан тавыш бирүне “Бердәм Россия” партиясе генә куллана.
Быел җирле үзидарәләрнең вәкиллекле органнарына сайлауларга кандидатларны алдан сайлап алу киң күләмдә үтә. 20 майда шундый очрашу җыелышы Үрнәк авыл җирлегендә узды. Әлеге авыл җирлеге Советына 10 депутат сайланачак. Менә шушы мандатларга дәгъва итүче 15 кеше исемлеккә кертелгән. Шулар арасыннан Илгиз Камалетдинов, Фәнис Тимашев, Рамил Мөхәмәдияров үзләренең программалары белән чыгыш ясадылар.
Соңыннан яшерен тавыш бирү үткәрелде. Аның нәтиҗәләре буенча иң күп тавыш җыйган 10 кеше сайлауларда кандидат булып катнашачак.
Ильяс Фәттахов