Эшче һөнәр ияләре дәрәҗәле

Эшче һөнәр ияләре дәрәҗәле
Бер безнең районда гына түгел, Татарстанның хезмәт базарында да бүген гади һөнәр белгечләре – токарьлар, слесарьлар, ташчылар, бетончылар, фрезерчылар, авыл хуҗалыгында савымчылар, агрономнар, механизаторлар, ветеринария табиблары җитешми. Хезмәт кешесенең дәрәҗәсен күтәрү, яшьләрне җитештерү предприятиеләренә тарту – менә бүгенге көн проблемасы.
Шуны күздә тотып үткәрелә дә инде эшче һөнәрләр буенча ачык милли чемпионат. Узган ел да Казанда 400дән артык егет һәм кыз 35 төрле эшче һөнәр буенча осталыкларын сынады. Быел урта махсус уку йортларында белем алучы егетләр һәм кызлар яңадан Казанга эшче һөнәрләр буенча өченче ачык милли чемпионатка җыелды.
Чемпионатның төп чаралары “Казан” ярминкәсе күргәзмә үзәгендә үтте. Биредә Татарстан районнары имтихан тотты. Һәр район үз төбәгенең бизәге булган эшче һөнәрләр буенча күргәзмә оештыр- ган иде.
Безнең Арча ягы читек, түбәтәйләре белән Татарстан, Россиядә генә түгел, хәтта чит илләрдә дә таныш. Бу юлы да милли бизәкләр төшерелгән искиткеч матур читекләр, чүәкләр, татар халкының милли киемнәре күпләрне сокландырды.
Илсөя Әхмәдиева 10нчы сыйныфтан бирле чүәк чигә. Озак еллар милли аяк киемнәре фабрикасында эшли, аннан соң да бу һөнәрен югалтмый. Айрат Солтанов җитәкләгән кечерәк кенә бер оешмада чүәк, читек, түбәтәйләр, сумкалар кисә, тегә, төпли, чигә.
Оста барда, телең тый, диләр. Осталар тәкъдим иткән эшләрне күреп, болай да телсез каласың. Шунысы сөендерә, әлеге һөнәрләр серләренә укытучылар балаларны мәктәптә үк төшендерә.
– Технология дәресләрендә чигәргә, кул эшләренә дә өйрәтәбез, – ди Арчаның икенче мәктәбенең технология укытучысы Гөлназ Ибраһимова. – Мәктәп яшеннән үк алар түбәтәйләр, күзлек, бизәнү әйберләре савытлары, мәктәпнең курайчылар ансамбле өчен татар милли киемнәре, камзуллар тегәләр, чигәләр.
Арчаның җиденче мәктәбе укытучысы Альбина Зыятдинова мөселман кызлары өчен үз стиле, үз дизайны белән яулыклар, калфаклар тегә. Матур, үзенчәлекле. Үз тәҗрибәсен балалар белән дә уртаклаша. “Түгәрәк алып барам. Балалар бик теләп шөгыльләнә. Аларда эшче һөнәрләргә мәхәббәт тәрбияләүнең бер төре дә бу, – ди ул. Барлык концерт костюмнары да Альбинаның иҗат җимешләре. Мәктәптә (бу мәктәпнең укучылар һәм укытучылар коллективы район күләмендә оештырылган концерт–спектакльләрдә актив катнаша) шундый оста куллар булу үзе зур хәзинә.
Иске Кырлай мәктәбенең тарих укытучысы Гөлназ Хәбибуллина кәгазьдән ниләр генә ясамаган – Сөембикә манарасы, Казан Кремле, Арча һәм Татарстан герблары… Ә сәйләннән ясалган чәчәкләрне чын диярсең.
– Мәктәптә 8–12 яшьлек балалар өчен түгәрәк алып барам. Аларны да шушы эшләрнең серенә төшендерәм, – ди ул.
Педагогика көллиятененең сәнгать укытучысы Алия Фаздалова сувенир сабыннар ясау белән шөгыльләнә икән. Яңа Чүриледән Ильяс Халитов кошлары, кайда гына булмасын, шунда ук игътибарны үзенә җәлеп итә.
Арча агросәнәгать көллияте эшче һөнәрләргә өйрәтүче уку йорты. Менә анда инде ул осталар. Бу юлы да тимердән күп төрле кул эшләре тәкъдим иттеләр. Умартачы Ядкәр Мөхәммәдиев бал продуктларын, сәнгать мәктәбе укытучысы Нияз Миннемуллин агачтан эшләнмәләрне күргәзмәгә куйган. Арча районы “төзегән” йорт бизәге булып Арча Укучылар сарае (җитәкчесе Руслан Гыйниятуллин) алып килгән ат макеты тора. Арча үзешчәннәре чыгышы исә бу хозурлыкка ямь өстәде.
Гөлсинә Зәкиева