Машинаны велосипедка алыштырабызмы?

Машинаны велосипедка алыштырабызмы?
Беркөн Арча үзәгеннән китеп, Банк урамы аша педагогика көллияте тирәләрен дә урап үтеп, соңыннан яңадан үзәктә очрашкан, ЮХИДИ машиналары озата барган бер төркем велосипедчыларга игътибар итми калмагансыздыр.
“Барыгыз да велосипедларга!” исемле акция кысаларында үтте ул. Велосипедта йөрергә яратучыларны Арча шәһәр Советы башкарма комитеты җитәкчесе Рафил Исмәгыйлев матур теләкләр белән озатып калды.
– Бу акциядә теләге булган һәркем – олысы, кечесе катнаша ала иде. 50дән артык кеше җыелды. Арча мәктәпләре укучылары белән беррәттән район Мәдәният йорты хезмәткәрләре дә, балалар һәм яшүсмерләр спорт мәктәбе тренерлары да велосипедка утырды. Әлеге акция ГТО нормаларын тапшыру декадасына да багышланды, – диде яшьләр эшләре, спорт һәм туризм бүлеге җитәкчесе Зиннур Сәгыйтов. – Аннан велосипедта йөрергә теләүчеләр өчен мөмкинлек тә тудырырга тырыштык. “Арча” спорт комплексы янында дүрт, район Мәдәният йорты каршында алты велосипед тора. Аларны прокатка алырга була.
Шунда велосипедчылар, тиешле араны үтеп, үзәккә якынлашты. Күренеп тора, бар да канәгать. Балалар гына түгел, өлкәннәр дә.
– Күптәннән велосипедка утырып, моның кадәр араны үткән юк иде. Йөрергә кирәк икән, – ди район мәдәният идарәсе җитәкчесе Рамил Мөхетдинов. – Тик машина үз урынына, велосипед үз урынына кирәк.
– Мин эшкә станциядән җәяү йөрергә тырышам. Хәрәкәт бик кирәк икән, – дип кушыла район Мәдәният йорты хезмәткәре Расих Галимҗанов.
7нче мәктәпнең 7нче сыйныф укучылары Айрат Хисмәтуллин белән Раушан Мостафинга да бу акция бик ошаган.
– Алар мәктәпкә дә велосипедта килә. Организм өчен бик әйбәт ул. Мускулларны ныгыта, – ди 7нче мәктәп укытучысы Булат Гәрәев.
– Тик шунысын онытмасыннар иде, велосипедта юлга чыкканда да барлык юл хәрәкәте кагыйдәләрен үтәргә кирәк, – ди ЮХИДИ идарәсенең Арча бүлекчәсе җитәкчесе Илдар Нотфуллин.

Сәхифәне Гөлсинә Зәкиева әзерләде