Әнисенә үпкәли

Әнисенә үпкәли
Арчаның җәмәгать суды утырышында 20 яшьлек Иринага карата (фамилиясен язмаска булдым) җинаять эше каралды. Утырыш җәмәгать судьясы Марат Камаев рәислегендә прокурорның өлкән ярдәмчесе Ленар Мөлеков катнашында үткәрелде.
2014 елның февралендә Казанда туып–үскән, хәзерге вакытта Әтнәнең бер авылында яшәүче Ирина, Арчага килеп, электрон җиһазлар сатучы бер кибеттән, сыер савучы булып эшлим дип ялганлап, кредитка 19300 сумлык ике планшет ала. Әмма кредитны түли алмый. Чөнки беркайда да эшләми. Бүген инде түләнәсе кредит акчасы 26 мең сумнан артып киткән. Кредитны рәсмиләштергән банк полициягә мөрәҗәгать итә. 2015 елның 21 маенда Ирина суд каршына басты.
Балалыгы да чыгып җитмәгән япь–яшь кыз. Бер ир белән яши. Анысы да урлашу өчен хөкем ителгән. Иринаның баласы юк. Судта кыз үзенең гаебен таныды. Бәхете, 2015 елның 24 апрелендә Бөек Җиңүнең 70 еллыгы уңаеннан көченә кергән закон нигезендә амнистиягә эләкте.
Районда алдау юлы белән кредит алу очраклары булып тора. Өлкән яшьтәге хатын бер әби исеменә, акчасын үзем түлим дип, кредитка мультиварка, планшет, кер юу машинасы алган. Әмма кредитны түләмәгән. Банк мескен әбидән кредит түләүне таләп итә башлаган. Бу чуалчык хәлгә җәмәгать суды нокта куя. Алдакчы хатын кредит акчаларын түләргә мәҗбүр була. Ә берәү хәтта ясалма пас- порт белән кредитка 44 мең сумлык телевизор ала.
21 майда булган җәмәгать суды утырышыннан соң Ирина белән, хәлен аңларга тырышып, җайлап кына сөйләштем.
— Әти–әниең бармы? — дип сорыйм.
— Әни исерек, мине энем белән балалар йортыннан бер чуаш гаиләсе тәрбия- гә алып үстерде.
— Ул гаилә белән элемтәгез бармы?
— Юк...
— Сезне тәрбиягә алган әти белән әнине яраттыгызмы?
— Үзара җылы хисләр булмады. Аларга нәрсә.., безнең өчен ай саен акча алып бардылар. Үзләренең дә өч баласы бар.
— Алар белән мөнәсәбәтләр ничек булды?
— Берничек тә... Дуслык, туганлык хисләре ялганмады.
— Ә нишләп кире балалар йортына кайтаруны сорамадыгыз?
— Анда да яхшы түгел.
— Сез кемгәдер үпкәлисез кебек.
— Әйе.
— Кемгә: кешеләргәме, тәрбиягә алган гаиләгәме, әллә үз әти–әниеңәме?
— Әнигә...
— Бүген киредән авылга кайтырга акчаң бармы?
— Юк...
— Ә нишләп эшкә урнашмыйсың?
— Авылда эш юк.
Дөрес булса, Ирина Әтнә техникумын тәмамлаган. Ятим бала буларак, Яр Чаллыдан фатир биргәннәр. Шунда китәргә уйлый. Эшкә керергә үгетлим. Саубуллашканда урамда көтеп торырга куштым, юлыңа акча бирермен, дидем. Ул риза булып чыгып китте. Эш буенча азрак тоткарланырга туры килде. Чыкканда Ирина китеп барган иде инде.
Румия Надршина