Җәмәгать ярдәмчеләре Арчада

Җәмәгать ярдәмчеләре Арчада
“Казан арты” тарих–этнография музеенда Татарстан Республикасында Кеше хокуклары буенча вәкаләтле вәкиле Сәрия Сабурская үзенең республика районнарындагы җәмәгать ярдәмчеләре белән “Гражданнарның торак хокукларын саклауга булышлык” темасына семинар–киңәшмә үткәрде.
Киңәшмәгә килүчеләр тәҗрибә уртаклашуны Арчадагы социаль яклау бинасында урнашкан ТР Кеше хокуклары буенча вәкаләтле вәкиленең җәмәгать кабул итү бинасыннан башлады, җәмәгать ярдәмчесе Ринат Һидиятовның эшчәнлеге белән танышты.
Ринат Әлифхан улы әлеге вазыйфаны 5 ел башкара. Шул еллар эчендә нинди генә сораулар кабул итеп, нинди генә мөрәҗәгатьләрне хәл итәргә туры килмәгәндер! “Быел 1нче кварталда гына да 16 гариза каралды. Гаризаларның берсенә дә битараф калмыйбыз, һәммәсен хәл итеп бетереп булмаган очракта киңәшләр бирәбез”, – ди Ринат Һидиятов.
Аннан кунаклар өлкәннәр һәм инвалидлар йортына сәяхәт кылды. Арчадагы төрле программалар буенча төзелгән торак йортлар белән танышты. “Казан арты” музеендагы экспонатларны карап чыкканнан соң, акт-лар залында киңәшмә уздырылды.
Киңәшмәнең безнең районда узуының сәбәбе гади — төзелешләр, торак мәсьәләләре буенча үрнәк итеп күрсәтерлек хезмәтләр күп. Семинар кунаклары белән очрашуда район башкарма комитеты җитәкчесе Илшат Нуриев катнашты. Ул район күләмендә социаль–икътисадый яктан уңай үзгәрешләргә тукталды. Төзелеш өлкәсендә конкрет эшләр белән район башкарма комитеты җитәкчесенең беренче урынбасары Илшат Галимуллин таныштырды.
Семинар–киңәшмәдә шулай ук ТР Дәүләт торак инс- пекциясе җитәкчесе Сергей Крайнов һәм ТР күпфатирлы йортлар идарәче оешмаларының бердәмлеге директоры Назиф Фатыйхов чыгышлары тыңланды. ТР Кеше хокуклары буенча вәкаләтле вәкиле Сәрия Сабурская агымдагы елның 1 кварталына нәтиҗәләр ясаганнан соң киләчәккә планнар турында сөйләде.
Җәмәгать ярдәмчеләренең кеше хокукын һәм иреген яклау эшендә роле елдан–ел арта бара. Зур тормыш тәҗрибәсенә ия, җирле халык белән аңлаешлы мөнәсәбәт урнаштыра белүче ярдәмчеләр күп кенә проблемалар, сорауларны тиз арада хәл итәргә тырыша.
Розалия Зиннәтова