Бергәлектә көч

Бергәлектә көч
Казанда 2015 елның апрелендә иҗтимагый оешмаларның “Президент белән бергә” форумы булды. Татарстанда “Президент белән бергә” дигән республикакүләм иҗтимагый хәрәкәт эшли башлады. Аның төп максаты – татарстанлыларның, Президент Рөстәм Миңнеханов инициативаларын һәм социаль программаларын тормышка ашыруга теләктәшлек белдереп, республика үсешендә катнашуы.
“Президент белән бергә” иҗтимагый хәрәкәте безнең районда да оешты. Аның җитәкчесе – Руслан Сафин. Руслан Арча педагогика көллиятен тәмамлаган егет. Мурманскида хәрби диңгез флотында армия хезмәте үткән. Читтән торып югары белем алган. Биектауда “Кос-тер” республика үзәген җитәкләгән. Бер ел инде менә Арчада. Казанда туса да, хәзер Арчада яши. Бүген районда җәмәгать тәртибе буенча “Форпост” яшьләр үзәген җитәкли. Күптән түгел Арча мәйданына 300ләп егет һәм кызны җыеп, флешмоб-батл оештырды. Аны Руслан үзе алып барды. Яшьләр сәгать буе бертуктамый биеде. Бергәлектә көч дигәндәй, бик канәгать булдылар. Бу үзенә күрә сәламәтлек тә, үзара аралашу, туплану һәм яңа эшләргә кәеф күтәренкелеге дә. Президент Рөстәм Миңнеханов 20 май көнне уздырылган журналистлар белән очрашуда болай диде: “Президент белән бергә” иҗтимагый хәрәкәте – ул республика үсешенә битараф булмаган, аны алдынгы, тагын да уңайлы итәргә теләгән кешеләр. Без аларга моның өчен бик рәхмәтле. Бу бик позитив хәрәкәт”.
– “Президент белән бергә!” иҗтимагый хәрәкәткә яшьләр оешмалары гына түгел, шулай ук балалар һәм ветераннар оешмалары да керә, – ди Руслан Сафин. – Теләге булган һәркем хәрәкәткә кушыла ала.
Бу көннәрдә алар балалар һәм яшьләр өчен “Пятница” тайм-кафесы эшләү белән мәшгуль. Монда спиртлы эчемлекләр һәм тәмәке тарту тыелачак. Яшьләр вакытларын кызыклы һәм файдалы үткәрәчәк.
– Бу мәсьәләне район башкарма комитеты җитәкчесе Илшат Нуриев белән очрашуда студентлар күтәреп чыкты, – дип сөйли Руслан. – Студентлар арасыннан Динә Мамаделеева бу кафены булдыруда бик теләп булыша.
27 майда кичке сәгать 7ләрдә Арчаның күпфункцияле үзәгенә барып килдем. Яшьләр мәш килеп, “Пятница” тайм-кафесын эшлиләр. Руслан Сафин, балигъ яшенә җитмәгән балалар белән эшләү комиссиясе сәркатибе Лилия Завялова да яшүсмерләр белән шунда. Ирек- ле “Волонтер” үзәге җитәкчесе, Арча педагогика көллияте студенты Рамилә Диярова үзе белән бер төркем волонтерларны алып килгән.
– Кичегезне әрәм итеп, бушка эшлисегез киләме? – дип сорыйм.
– Нишләп кичләребез әрәм булсын, үзебез өчен ич, файдалы эш башкарабыз лабаса! – дип шаулашты алар.
– Бүген без Арча кызы Ләйсәнне дәвалау өчен хәйрия концертлары да оештырабыз, – дип сөйләде активист Зөһрә Ситдыйкова. – Балаларны тернәкләндерү үзәгендә дә, өлкәннәр янында да булабыз. Мәрхәмәтлек акцияләре һәм төрле чаралар оештырып, Президент Рөстәм Миңнехановның инициативаларына һәм программаларына теләктәшлек белдерәбез, халыкка якынрак булабыз, республика үсешендә катнашабыз.
Румия Надршина