Табигать кочагында

Табигать кочагында
Рөстәм Миңнеханов тәкъдиме белән 2015 ел Парклар һәм скверлар елы дип игълан ителде. Шушы уңайдан яшел ял зоналарын төзекләндерүдә күләме һәм нияте буенча гаять зур программа тормышка ашырыла.
Республика Президенты күзаллавынча, парк һәм скверларны төзекләндерү кешеләрдә ял итүнең яңа культурасын формалаштырырга тиеш. Һәркем күңеленә хуш килерлек шөгыль таба алырлык шартлар тудыру мөһим. Табигать кочагындагы ялның өстенлекләрен шәһәр уңайлыклары белән берләштергәч, яшел зоналар яңа иҗтимагый тормыш учагына әвереләчәк.
Март аенда Рөстәм Миңнехановка республика башкаласының парк зоналарын төзекләндерү проектлары тәкъдим ителде. Президент бу идеяләрне хуплады, әмма, үзгәртеп коруга керешкәнче, аларны халык белән тикшерер- гә кушты. Проектларны җәмәгать тикшерүләре башланды инде.
2015 елда барысы 160 парк һәм скверны төзекләндерү планлаштырыла. Әлеге максатларга республика бюджетыннан шәһәр һәм районнарга 1 миллиард сум акча бирелә. Булган яшел зоналарны тәртипкә китерү һәм 800 гектарда яңаларын булдыру планлаштырыла.
– Президентыбыз 2015 елны республикада Парклар һәм скверлар елы дип игълан иткәч тә без шәһәрдәге яшел зоналарны тагын бер тапкыр барлап чыктык, – ди Арча шәһәр башкарма комитеты җитәкчесе Рафил Исмәгыйлев. – Алар әлегә барысы 14, предприятие, оешма, учреждениеләрне җаваплы итеп беркеттек. Һәркайсы күпмедер күләмдә эш башкарды инде. Шулай да, Г.Тукай исемендәге Арча педагогика көллияте, ветеринария берләшмәсе, “Айракс”, “Круг” ширкәтләрен, ЗУЭС коллективын, “Арча” балалар–яшүсмерләр спорт мәктәбен, социаль–гуманитар академия филиалын аерым билгеләп үтәсе килә.
– Яшел зоналар арасында, билгеле, “Стадион” паркы үзенең зурлыгы, әһәмияте белән аерылып тора, – дип дәвам итте Рафил Рәис улы. – Минем республика районнарында, Россиянең төрле төбәкләрендә федераль Сабантуйларда булганым бар, аларның берсендә дә Сабантуйга яраклаштырылган файдалану мөмкинлекләре зур булган мондый стадион юк.
– Сабантуй димәктән, бу көннәрдә редакция телефоннары еш чылтырый, стадион өчен кемгәдер зур суммада аренда түләргә кирәк икән, диләр...
– Безгә дә шалтыраткалыйлар. Берәү дә борчылмасын – стадион да (4,5 гектар), ипподром да “Арча муниципаль район” муниципаль берәмлеге милке, халык байлыгы. Стадиондагы корылмалар, спорт җайланмалары ел әйләнәсе халыкка хезмәт итә. Стадионны тагын да камилләштерү буенча планнар бар, быел футбол кыры эшләнә.
2015 елда Арча районында парклар һәм скверлар төзү, үзгәртеп кору буенча максатчан программа эшләнде. Әлеге эшләргә республика бюджетыннан 13 млн. сумнан артыграк акча бирелде. Программада Галактионов урамында Җиңүнең 70 еллыгы хөрмәтенә үзәк парк, Космонавтлар урамында Габдулла Тукай исемендәге сквер, Коммуна урамында вокзал яны скверы эшләү планлаштырыла. Болар өчен бу акча гына җитми, билгеле. Предприятие, оешмалар, аерым кешеләр әлеге игелекле эшләргә үз өлешләрен кертә.
Хәзерге вакытта үзәк парк һәм скверларның проектлары әзерләнә. Алар әзер булгач, халык тикшерүенә чыгарылачак.
Ильяс ФӘТТАХОВ