Халык инансын

Халык инансын
Узган шимбәдә Татар Кәдрәге авылы зиратында өмә булды – койма кордылар.
Аны Иске Чүриле мәктәбенең тарих укытучысы, җирлек Советы депутаты Рамил Гарифуллин башлап йөргән. Иске Чүриледән бертуган Фәрит (эретеп ябыштыручы), Рәдиф, Фәнис Гарифуллиннар, Мансур Галиев, Олег, Тимур Сәйфуллиннар, Наил Хөснетдинов, Рамил Хәмидуллин, Руслан Акулов, Илнур Габдрахманов, Әхмәт, Алмаз Шәмсетдиновлар, Эдуард Далалеев, Раил Хөсәенов, Арчадан Раил Вәлиев, Татар Кәдрәгеннән Камил Нәбиуллин иң активлар булды.
– Бу эш үзара салым акчасына башкарылды. 50шәр сумнан 41 мең сум акча җыелды. Ул дүрт тапкыр артып, барлыгы 205 мең сум булды. Акча тулысынча материаллар белән тәэмин итүче оешмага күчерелде, – диде Иске Чүриле авыл җирлеге башлыгы Гөлнара Заһидуллина. – Безнең җирлектә зиратларны коймалыйсы бар иде. Штерәдә иганәче Фаил Галиәхмәтов мәчетне дә салдырды, зиратны да коймалатты, Ашабашта Ринат Гарәфиев 100 мең сум биреп һәм халык җыелып, зиратны койма белән әйләндереп алдылар. Шуңа бу акчаны тигезләп бүлеп, Иске Чүриле, Татар Кәдрәге һәм Венета авыллары зиратларын төзекләндерүгә файдаланырга булдык. “Татарстан” агрофирмасы” ширкәте (җитәкчесе Рүзәл Мәрдәнов) су китертте. Гомумән, ширкәт бернинди эштән дә читтә калмый, һәрвакыт ярдәм итәргә әзер тора. Зиратларны чистартканда, чүплекләрне тәртипкә китергәндә дә техника белән булышты. Халык бу акчаның үзләренә файдалы эшкә тотыласына башта ышанып бетмәгән булса, хәзер инде инанды. 2015 ел өчен 200әр сумнан бирделәр. Венета зонасында барысы 6 мең сум гына җыелды. Зиратларын төзекләндерү өчен 43 мең сумлык материал алып кайткач, быел акчаны кеше үзе китереп бирә башлады. 2015 елгы үзара салым акчасын урам утларын, чишмәләрне карау, зиратлар өчен тотарга планлаштырабыз. 2016 елда да дәвам итсә, авыл урамнарын төзекләндерәчәкбез.
– Безнең авыл җирлегенә 8 авыл керә, – диде Күпербаш авыл җирлеге башлыгы Фәргать Сираҗетдинов. – Барлыгы 135900 сум акча җыелган иде, ул 679500 сум булып кайтты. Һәр авылның акчасы үзенә тотыла. Түбән Мәтәскәдә, мәсәлән, 28900 сум җыелган иде, хөкүмәт тарафыннан өстәлеп, 144500 булды. Авыл зираты чис- тартылды. 50 мең сум шул эшне башкаручы фермер хуҗалыгына күчерелде. Иске Кырлайда (21400 сум җыелды, 107 мең сум булып кайтты) зират коймалап алынды. 72 мең сум акча материаллар белән тәэмин итүче предприя- тиегә күчерелде. Эшен халык үзе башкарды. Барысы да күз алдында. Әле акчалары тотылып бетмәде. Сабантуйлардан соң эш дәвам итәчәк.
Башка авыл җирлекләрендә дә бу юнәлештә нинди эш алып барылуы белән кызыксындык. Кайберләренә акча әле бөтенләй күчмәгән. Сәбәбен сорап, район финанс-бюджет палатасы җитәкчесе Фәнис Исмәгыйлевка мөрәҗәгать иттек.
– Авыл җирлекләренең документларны дөрес итеп тутырып китерүләре генә кирәк, – диде ул. – Акчаны бернинди проблемасыз күчерәбез.
Гөлсинә Зәкиева