Бер йортта ике җиңүче

Бер йортта ике җиңүче
Алар Арчада “Беренче сыйныф укучысының мәдәни көндәлеге” җиңүчеләрен бүләкләү тантанасында билгеле булды — “Иң яхшы мәдәни көндәлек” номинациясендә Иске Чүриле мәктәбе укучысы Әлфис Һидиятуллин һәм “Иң мәдәниятле әти–әни” номинациясендә аның әнисе Алия Һидиятуллина.
Көндәлек ел дәвамында беренче сыйныф укучыларына музей, театрларда, китапханәләрдә төрле чараларда катнашырга, Казан шәһәренең һәм республиканың тарихи урыннарында булырга мөмкинлек бирде. Әлбәттә, әти–әниләр ярдәменнән башка уңышларга ирешү җиңел түгел. Кыйм- мәтле вакытын, көчен кызганмыйча, балаларын дөньяны танып–белү өчен төрле истәлекле урыннарга йөртеп, тарихи ядкәрләр белән таныштырып, балаларына никадәр рухи кыйммәтләр бүләк итте алар!
Алия Мәсхүт кызы үзе әни, үзе укытучы. Үз сыйныфында белем алучы Әлфис — дүрт балалы ананың өченче улы — абыйларының булдыклы энекәше, сеңлесенең яраткан абыйсы.
Үзем укыткан сыйныфта 10 бала белем ала. Аларны бергәләп еракларга сәяхәткә алып барырга мөмкинлек булмаса да, авылдагы, райондагы музейларда булдык, Яңа Кырлайга Нәүрүз бәйрәменә бардык. Анда күргәннәре турында балалар шактый вакыт сөйләде. Ә Әлфисне үзем белән төрле җирләргә йөртергә тырышам. Казанда тарихи урыннарда, театрларда булдык, бергәләп Балтачның күренекле урыннарын карадык. Үзебезнең районда түбәтәй чигүчеләрнең хезмәте белән танышсак, Балтачта бия- ләй чигү осталары белән очраштык. Әлфис күргән һәр яңалыгы белән кызыксына. Мин биргән мәгълүмат кына җитми, өстәмә сораулар да бирә, — дип сөйли Алия ханым.
Әлфис абыйлары үрнәгендә тәрбияләнүче булачак спортчы. Аның инде спорт өлкәсендә үз уңышлары бар. Әйтик, быел “Татарстан чаңгы юлы – 2015” массакүләм Бөтенроссия чаңгы ярышларында 7 яшькәчә малайлар арасында Әлфис район күләмендә 1 урынга лаек булды. Спортта гына түгел, һәр өлкәдә беренче ул. Быел бер генә тапкыр кулланыла торган стаканнардан кар бабай ясап республиканың “Мәдәни эшләнмәләр” бәйгесендә алдынгы урын яулады. Әлфиснең әнисе белән бергә бизәп ясаган мәдәни көндәлеге күргәзмә әсбапка тиң. “Әти–әнием белән без күп матур җирләрне күрдек, күргәннәрне әнием миңа аңлатып барды”, — ди Әлфис.
Сәхнәдә Әлфис янәшәсендә 1 урын яулаган Яңа Кенәр мәктәбеннән Лилия Мөхәммәтшина һәм Югары Аты мәктәбеннән Рамил Мөхәммәтгалиев та үзләренең лаеклы урынын алды. Икенче көнне алар Казанга “Әкият” курчак театрына сәяхәт кылды.
Икенче урын Урта Курса мәктәбеннән Галим Гарифуллин, Яңа Кенәр мәктәбеннән Айгөл Галимова, Арчаның 7нче мәктәбеннән Алмаз Хәйретдиновка бирелде. Өченче урынны Арчаның 1нче мәктәбеннән Алисә Йосыпова, 4нче мәктәптән Гүзәл Әһлиева, 5нче гимназиядән Данил Евдокимов бүлеште.
Әлбәттә, әти–әниләр янында сыйныф җитәкчеләренең хезмәте дә игътибарга лаек. Шундыйлардан берсе — Югары Аты башлангыч мәктәбе укытучысы Альбина Мөхәммәтгалиева. Ә менә Шушмабаш, Апаз, Арчаның 7нче мәктәпләрендә белем алучы укучыларның сыйныф җитәкчеләре аларның һәммәсен бергәләп төрле музей, китап- ханәләргә алып барган, хәтта Казанга барып истәлекле урыннар белән танышырга да өлгергәннәр. Рухи яктан баеп кайткан бу укучылар “Иң мәдәни сыйныф” номинациясе җиңүчеләре булды. Сүз уңаеннан укучылар инициативасы белән районда шушы көннән 1–11 сыйныф укучылары арасында “Иң мәдәни сыйныф” конкурсы игълан ителде. Ул 2015 елның декабренә кадәр барачак.
9 ай элек кенә мәктәп бусагасын атлап кергән укучылар шушы проект ярдәмендә шактый мәгълүмат тупларга өлгерде. Укучыларның шатлыгын уртаклашырга килгән җитәкчеләр һәммәсе бу проектның дәвамлы булуын, мәктәпләргә киләчәктә шушы рухны дәвам итәргә кирәклеген әйтә.
Әнә, икенче урын яулаган Галимнең әнисе Рәсилә ханым да шул фикердә:
— Без җиңү яулау өчен тырышмадык, — ди ул, — бары улыбызны, әти–әнисенең туган җирләре — Арча һәм Әгерҗе яклары тарихын аңына сеңдерү максатыннан истәлекле урыннарга алып барырга тырыштык. Ә тарих — туган йорттан, әти–әни нигезеннән башлана. Бу бәйге алга таба да дәвамлы булсын иде.
Розалия Зиннәтова