Печән әзерләргә вакыт

Печән әзерләргә вакыт
Белгечләр май кояшы астында үскән үләннәрне витаминнарга бай дип мактыйлар, алар югалып беткәнче, җыйнап алырга киңәш итәләр.
Быел печән әзерлим дигән кешегә әллә кая барып йөрисе юк, һәркайда ерып йөри алмаслык үлән. Тик чалгы тоткан кешеләр елдан–ел азрак күренә.
Түбән Аты авылында яшәүче Айрат Каюмов һәр елны печәнлекләрен гаиләсе белән әзерләгән җиләкле, мәтрүшкәле елга печәне белән тутыра иде. Аңа шалтыраттым.
— Йорт янындагы бакчаның бер өлешенә кындырак чәчкән идем, бик уңды. Башта шуны җыеп алабыз. Аннан чират елгаларга, карап кайттым инде, бик яхшы үскән. Җиде баш эре мал бар безнең, шуларга җитәрлек печән әзерлибез.
“Ватан” ширкәтендә печән әзерләүгә һәр елны иң алдан керешәләр. Иң сыйфатлы печән дә шушы хуҗалыкта була. Быел 160 гектарда кындырак үләнен урдылар инде. Фәнис Хлопушин “Полесье” комбайны белән нормасын күпкә арттырып үти.
2 июньдә бу хуҗалыкта рулонлап печән әзерли башладылар.
“Северный” ширкәтендә Ринат Нәбиуллин “Че- ленджер” комбайны белән 116 гектардагы күпьеллык үләннәрне урдырды.
“Кырлай”, “Игенче” ширкәтләрендә дә күпьеллык үләннәрне печән әзерләү өчен уралар.
Узган шимбәдә үткәрелгән киңәшмәдә район башкарма комитеты җитәкчесе Илшат Нуриев һәр хуҗалыкта кичекмәстән печән, витаминлы үләннәр әзерләүгә керешергә вакыт икәнлеген искәртте.
Быел “Ак барс” агрокомплексы”, “Ватан”, Тукай, “Северный” ширкәтләрендә, Хәлилов крестьян–фермер хуҗалыгында республика программасы буенча силос–сенаж траншеялары төзелә.
Хәзерге вакытта иң мөһим эшләрнең берсе — чәчүлекләрне карау. “Татарстан” ширкәтендә, “Курса МТСы”нда 2450 гектарда, “Ватан” ширкәтендә 1616 гектарда чәчүлекләрне шытымнар чыкканчы тырмаладылар.
“Кырлай”, “Ватан”, “Игенче”, “Курса МТСы” хуҗалыкларында чәчүлекләрдә корткыч бөҗәкләргә, чүп үләннәргә, авыруларга каршы сиптерү үткәрелде.
Ильяс Фәттахов