Ул табигатьне сөя

Ул табигатьне сөя
“Казан арты” тарих–этнография музеенда 4 көн дәвамында якташыбыз Таһир Шәйхетдиновның күргәзмәсе узды.
Биредә агачтан эшләнгән ни генә юк иде: савыт–саба, көнкүреш кирәк–ярагы, үзенчәлекле сувенир, кувшин һ.б. Аларның һәммәсенә авторның кул җылысы, җан халәте салынган.
Күргәзмәдә сәнгать остасының (аны, һичшиксез, шулай дип атау урынлы булыр) 1984 елдан бирле тупланган хезмәте тәкъдим ителде. “8 сыйныфта укыганда чынлап тотынып ясый башладым, — дип сөйли сынчы. — Кызыксынуымны күреп, әтием агач эшләнмәләрне ясарга өйрәтү буенча китаплар алып кайткач, күп укыдым, өйрәндем”. Башлангыч сыйныфларда укыган елларында урманчы булырга хыяллана Таһир. Агачларга булган мәхәббәте этәрә аны андый хыялга. Чөнки, әнисе Зилә ханым әйтүенчә, табигатьне яратучы малай бакчага барганда ук туктап–туктап агачларга карый, аның ботакларын тормыштагы нәрсәгә булса да охшатып чагыштырырга ярата. Арча педучилищесына укырга кергәч, укытучылары Ринат Алмаев һәм Габделбәр Бәхтияров егетнең сәләтен тагын да үстерергә ярдәм итә.
Агач эшләнмәләрен ясау мизгелләре Таһир Флорес улын үз дөньясына бөтереп алса, агач материалларын юнәтү өчен урманчылыклардан рөхсәт кәгазьләре алу мәшәкатьләрен дә оныттыра, һәр көн лекцияләргә әзерләнү өчен кайчак кыйммәтле вакытын да “урлый” ул Казан дәүләт төзелеш һәм архитектура университеты доцентының. Уңышлы килеп чыккан эшләнмәләрне татарстанлылар гына түгел, Интернет челтәре аша чит илләрдә яшәүче сынчылар да күрү бәхетенә ирешә. Чөнки Таһир Шәйхетдинов үзе сыман агач эшләнмәләр белән мавыгучы күп кенә чит ил вәкилләре белән аралашып яши. Ә бу аның икенче күргәзмәсе, беренчесе Казан федераль университетында узган булса, өченчесе июльдә Татарстан рәссамнар берлегендәге җыелма күргәзмәдә көтелә.
Таһир Шәйхетдинов — районда гына түгел, Татарстанда билгеле шәхесләр Зилә һәм Флорес Шәйхетдиновларның өлкән улы. Зилә ханым җитәкләгән “Ләйсән” ансамблен хәтта чит төбәкләрдә дә яхшы беләләр. Төпчекләре Айрат сыман Таһирда да музыкаль сәләт булса да, рәсем сәнгате җанына якынрак. Юкса, ике ел институтта тарих укытучысы булырга дип алган белемен ташлап, көндезге бүлеккә Чаллы педагогия институтының рәсем сәнгате бүлегенә укырга керер иде мени?!
Сәләтле бала әти–әни өчен генә түгел, укытучыларына да горурлык. Шәкертләренең шатлыгын уртаклашырга укытучылары Ринат Алмаев белән Илдус Сәгъдиев та килгән. Сабакташы, музей директоры Ришат Камалов та соклануын яшермәде.
Таһирның нәсел дәвамчылары — улы да, кызы да рәсем белән музыканы бер дәрәҗәдә ярата икән. Алар да сәнгатьтән ерак китмәс, мөгаен. Әнә, әтиләре дә, кирпеч заводы күленнән төрле бөҗәкләр җыеп алып кайтып, шуларны өйрәнеп, күзәтеп утырыр- га, сүрәтләрен кәгазгә төшерергә яраткан, ул чакларда уйлап та карамагандыр иҗатының бүген Татарстанга билгеле булачагын...
Розалия Зиннәтова