Безнең боксчылар сынатмады

Безнең боксчылар сынатмады
“Арча” спорт комплексында 1999–2002 елгы егетләр һәм кызлар арасында Татарстан Республикасы “Динамо” спорт җәмгыяте федерациясе ачык беренчелеге булды.
– Тормышларын бокска багышлап, шуның белән яшәүче кешеләр, Марат Галиев кебек энтузиастлар бар. Бу турнирның Арчада үткәрелүе дә аның инициативасы. Шуның тырышлыгы белән районда спортның бу төренә зур урын бирелә. Хәтта Европа һәм дөнья чемпионы Гөлүсә Галиева да сезнең районнан, – диде “Динамо” спорт җәмгыяте федерациясе рәисе урынбасары, полиция полковнигы Салават Гайсин.
– Бокста кызларның активлык күрсәтүенә, аларның нәкъ менә боксны сайлауларына карашыгыз ничек? – дигән сорауга ул:
– Спортның бу төре Олимпия уеннарына да кертелгән. Кызлар хәзер егетләр белән беррәттән хәтта штанга да күтәрәләр, – дип җавап бирде.
Турнирда 13 командадан 78 спортчы катнаш- ты. “Арча” балалар–яшүсмерләр спорт мәктәбенең өлкән тренеры Марат Галиев һәм аның ярдәмчеләре Ләйсән Галиева, Илнур Хөсәенов җитәкчелегендә 10 егет һәм кыздан торган команда көчен сынады.
– Финалга 4 яшь боксчы чыкты, – диде Марат Галиев. – Азамат Галиев, Тимур Сафиуллин, Рифкать Сафиуллин яшьтәшләре арасында һәм үз үлчәү категориясендә турнир җиңүчесе булды. Булат Бакыев, Роберт Мәрдәнов, Али Галиев, Ралиф Ганиев призлы урыннарны яуладылар. Энҗе Зиннәтова, Анастасия Петрова, Диана Әхмәтшина да пьедесталга күтәрелделәр. Моннан тыш Азамат Галиев, Тимур Сафиуллин, Али Галиевка махсус бүләкләр дә тапшырылды.
– Мондый ярышта мин беренче тапкыр, – ди Арчаның беренче мәктәбеннән 6А сыйныф укучысы Энҗе Зиннәтова. – Бокска бик яратып йөрим. Күптән түгел генә шөгыльләнә башласам да, серләренә тиз төшендем. Турнирда беренче урынны алдым. Моның белән мин тренерым Ләйсән Галиевага рәхмәтле.
Ләйсән Галиева кул астында шөгыльләнүче тагын ике кыз – Арчаның беренче урта мәктәбеннән Диана Әхмәтшина (6А сыйныфы) һәм Анастасия Петрова (5Б сыйныфы) призлы икенче урынны яулаганнар. “Хәзер безнең командадан Азамат Галиевка уңышлар телибез”, – диде рингтан күзләрен алмыйча бокс көрәшен күзәткән кызлар.
Марат Галиев Арча шәһәре һәм Татарстан Республикасы төньяк–көнбатыш бокс федерациясе президенты, кызы Гөлүсә – спортның шушы төре буенча Европа һәм дөнья чемпионы, Азамат белән Али әлеге республикакүләм турнирда пьедесталның югары баскычларында, хатыны Ләйсән Галиева бокс буенча тренер…Үзе бер гаилә династиясе.
– Мин 7–10, 12–14 яшьлек малайлар һәм кызлар белән шөгыльләнәм, – ди Ләйсән. – Бу турнирда минем кызлар катнашты һәм призлы урыннарны яулады. Аларның барысы да боксчы булмаячак. Әмма кызлар һәм малайлар үзләрен ышанычлы тоталар, физик, эмоциональ һәм психик яктан ныгыйлар.
Җиңүчеләргә бүләкләр тапшыру тантанасына Салават Гайсин, СССРның атказанган спорт мас- теры, дөнья чемпионы ТРның бокс федерациясе президенты Айрат Хаматов, Казанның бокс үзәге директоры Андрей Спирин, Арча эчке эшләр бүлеге җитәкчесе, полиция полковнигы Айдар Баһавиев катнашты. “Динамо” җәмгыятен үстерүгә өлеш кертүчеләр дә бу көнне бүләкләнде, Гөлүсә Галиевага Россиянең халыкара класслы спорт мастеры билгесе тапшырылды.
Гөлсинә Зәкиева