Балалар өчен

Балалар өчен
«Созвездие – Йолдызлык” фестиваленә быел 15 ел булды. Республика Президенты аны Россиянең иң уңышлы проектларының берсе, дип атады. “Йолдызлык” фестивале хәрәкәте сәхнәне яраткан балалар өчен, бу үзенә күрә иҗат Олимпына трамплин булып тора. Ул сәләтле яшьләрне ачыклау өчен менә дигән мөмкинлек.
Эстрада сәнгатенең “Созвездие – Йолдызлык” ачык телевизион яшьләр фестивале һәрвакытта да Татарстан Президенты хуплавы белән үтте. Сәләтле балаларны үстерүгә Президент зур игътибар бирә. Әле менә 1 июньдә генә дә Рөстәм Миңнеханов “Созвездие – Йолдызлык-2015”тә җиңүчеләрне котлап, стипендияләр тапшырды.
– Арча балалар сәнгать мәктәбе әти-әниләр өчен зур бәхет, – дип сөйли Арчадан Раушания Закирова. – Безнең ике балабыз да шушы мәктәпкә йөри. 8 яшьлек улыбыз Данил, республика конкурсында курайда уйнап, 1 дәрәҗәдәге диплом алды. «Ар-и-Эль» хореография коллективы белән кечкенәләр төркемендә чыгыш ясап, “Йолдызлык” зона фестивалендә быел 2нче урынга лаек булдылар. Ә кызыбыз Камилә хореография, фортепьяно, вокалга йөри. “Йолдызлык” зона фес- тивалендә җырлап, 2нче урынны алды. Узган ел халыкара конкурста фортепьянода уйнап, лауреат булды. Һәр уку елы ахырында район Мәдәният йортында хисап концерты оештырыла. Фойедан ук сәнгать мәктәбенең хоры һәм оркестры каршы ала. Ә сәхнәдә төрле дәрәҗәдәге конкурс лауреатлары, дипломантлары чыгыш ясый. Татарстан Президентының сәләтле балаларны үстерүгә зур игътибар бирүенә инанып, сөенеп карыйбыз бу концертны.
– Без Әтнә районы Олы Мәңгәр авылыннан килеп йөрибез, – дип сөйли Алсу Мәрдәнова. – Баланы үстерү өчен мөмкинлекләр күп. Менә без Арча сәнгать мәктәбен сайладык. Улыбыз Мөнир хореография, вокал, баянга йөрде. Быел “Йолдызлык” зона фестивалендә җырлап, 2нче урынны алды. Республика “Йолдызлыгы”нда 3нче урынны алып кайтты. Хәзер Арча педагогика көллиятендә укый.
Конкурслар хәзер балалар бакчасыннан ук башлана. Әле менә күптән түгел Арчаның 10нчы балалар бакчасында районның нәни биючеләре “Үкчәкәй” конкурсы булды.
– Төрле дәрәҗәдәге конкурсларның оештырылуы әйбәт, – дип сөйли Арча сәнгать мәктәбе җитәкчесе Гөлнара Сабирова. – Президентыбыз бу турыда һәрдаим кайгырта. Конкурсларда баланың һөнәри осталыгы үсә, сәхнә культурасы камилләшә, көндәшлеккә бирешмәүчәнлек, өскә калкып чыгу тойгылары ныгый. 2012 елда респуб- лика проектында катнашып, грант отып, компьютер классы оештырдык. 2014 – Мәдәният елында өр-яңа рояльле булдык. Барысы да балалар өчен.
...Район Мәдәният йортында сәләтле балаларны хөрмәтләү тантанасында 1нче мәктәп укучысы, “Йолдызлык” фестивалендә нәфис сүз остасы буларак 2нче урынны алган Инсаф Гаптелбәров җырлап җибәрде – аның кыяфәте, үз-үзен тотышы, затлы тавышы – сокланып тыңладык. 1нче мәктәптә укытучы булып эшләүче җырчы әнисе Диләрә ханымның да тырышлыгы зур монда.
– Ә “Йолдызлык” фестивале ул үзе бер могҗиза! – ди анда катнашучылар.
Румия Надршина