Арча Әлифба Ватаны булсын

Арча Әлифба Ватаны булсын
Арча педагогика көллиятендә “Әлифба” музееның 15 еллыгы уңаеннан үткәрелгән Бөтенроссия фәнни–гамәли конференциядә галимә, филология фәннәре кандидаты, атказанган укытучы Рәсимә Шәмсетдинова Әлифба дәреслегенә һәйкәл куярга дигән тәкъдим белән чыккан иде. Аның бу тәкъдиме хуплап алынды һәм район җитәкчелеге, Татарстан Республикасы Мәгариф һәм фән министрлыгы, Татарстан Республикасы Дәүләт Советы депутаты Ринат Закиров һәм “Татспиртпром” ширкәте генераль директоры Ирек Миннәхмәтовның матди ярдәме белән бу юнәлештә эш тә башланган.
Һәйкәлне иҗат итәргә Арчада яшәүче талантлы яшь скульптор Михаил Сафин алына.
Һәм, ниһаять, ул үз урынын тапты. Михаил Рөстәм улы тәкъдим иткән композиция искиткеч матур гына түгел, бай эчтәлекле, уңышлы һәм зәвыклы. Менә ныклы адымнар белән алга атлаучы кызчык – тормыш, яшәү символы. Гүя ул Әлифба китабыннан чыккан да, киләчәккә омтыла. Янында кызчыкны озата баручы көчек – балачак символы. Ә ачык китап күкләргә омтылучы кош кебек, кешелек туплаган аң–белемне иң югары биеклеккә күтәрергә омтыла.
Узган атнада Михаил Сафинның иҗат җимеше Әлифбага һәйкәлне ачу тантанасы булды. Анда район башкарма комитеты җитәкчесе Илшат Нуриев, Бөтендөнья татар конгрессы башкарма комитеты рәисе урынбасары Данис Шакиров, Татарстан Республикасы мәгариф һәм фән ми- нистры урынбасары Гөлнара Габдрахманова, шагыйрь, Татарстан Респуб- ликасы Дәүләт Советы депутаты Разил Вәлиев, язучы–шагыйрә Флера Тарханова, Язучылар берлеге рәисенең беренче урынбасары Рәмис Аймәт, Рәсимә Шәмсетдинова һәм башка күренекле шәхесләр катнашты. Самара өлкәсенең Байтуган авылыннан да Нурания Авзалова җитәкчелегендә Сәләй Вагыйзовның авылдашлары, туганнары килгән иде. Кунакларны Флорид Гасыймов җитәкчелегендәге оркестр каршы алды.
Чара һәйкәл янында митинг белән башланып китте.
– Сез бүген Габдулла Тукай исемендәге педагогика көллияте тарихына алтын хәрефләр белән язылачак тагын бер вакыйганың шаһитлары булдыгыз, – диде көллият җитәкчесе Гөлнара Гарипова. – Биредә Сәләй Вагыйзов һәм Рәмзия Вәлитованы якыннан белгән, аларны хөрмәт иткән кешеләр, шәкертләре, татар җанлы милләттәшләребез катнаша. Бу урында Сәләй Вагыйзовның: “Аларны язуны сез дәвам итегез. Арча Әлифбаның Ватаны булсын иде”, – дигән сүзләрен искә төшерәсе килә.
Кунакларны район җитәкчесе Илшат Нуриев сәламләде. Разил Вәлиев (һәйкәл итеп куелган Әлифба китабына аның “Әлифба” шигыре уелган) тәэсирләре, Сәләй Вагыйзовның укучысы Флера Тарханова истәлекләре белән уртаклашты. Якташларының да әйтер сүзләре күп иде. “Алар Байтуганда Әлифба авторы туган йортны сатып алып, шунда музей булдыру өстендә эшлиләр, – диде Гөлнара Гарипова. – Безнең белән дә араны өзмиләр. Елга ике тапкыр фәнни–гамәли конференциягә киләләр. Быел аны халыкара дәрәҗәдә үткәрүне планлаштырабыз”.
Тантананың икенче өлешендә Арча педагогика көллияте тарафыннан республика күләмендә үткәрелгән музыка, җыр, авторлык шигырьләре, рәсемнәр, презентация- ләр, видеороликлар бәйгесендә җиңгән 75 кешене (барлыгы 730 кеше катнашкан) билгеләп үттеләр, һәр яктан уңыш яулаган 7 укучыга Бөтендөнья татар конгрессы башкарма комитетының исемле стипендиясен тапшырдылар.
Гөлсинә Зәкиева