Җилдән җитез тулпар атым

Җилдән җитез тулпар атым
Ат чабышы көндезге сәгать 12дә башланып китте.
Ярышның вакытында башлануы әһәмиятле. Аның, халыкны интектереп, соңга калып башланган еллары да булды. Барысы 25 ат ярышта катнашты. Биектау, Саба, Мари атлары да бар иде. Үзебезнекеләр көчле булып чыкты.
Атлар чабышы әйбәт оештырылган иде. Аларның старт бирү урыны да быел үзгә. Жюрига якын урында һәр төркемдә чабасы атлар аерым араталарга кертелгән иде. Стартка шуннан гына чыгып тезелделәр. Уңайлы булды.
Чабышкылар дүрт төркемдә ярышты. Беренчеләр булып ярышка 2 яшьлек 6 ат керде. Матур ярыш булды ул. “Ак барс” агрокомплексы”ның “Ультрастар” кушаматлы атында Александр Александров финиш сызыгын беренче булып үтте. Аның артыннан Яңасаладан Айрат Сафин аты килде. Җайдагы – улы Рузил. Өченче булып Мари аты финиш бирде.
Икенче һәм өченче төркемнәрдә ярымчиста токымлы бияләр һәм айгырлар аерым ярышты. Иң башта 11 бия старт алды. Көчлеләр беренче дүртлектә барды. Мондый матур ярышны каравы үзе бер күңелле! “Ак барс” агрокомплексы”ның 3 яшьлек “Полианзе Джаз” атында Александр Александров беренчелекне беркемгә дә бирмәде! “Ак барс” агрокомплексы” үз атларын Марида әзерли. Өченче нәтиҗә – Арчадан Рәмзил Рәхмәтуллинда.
Бияләргә караганда айгырлар аз булып чыкты, өченче төркемдә 3 кенә айгыр ярышты. Әмма сокландыргыч ярыш булды ул! Арчадан Рамил Рәхмәтуллин, Салават Бикбаев, Сабадан Рүзәл Рәхмәтуллин атлары көч ягыннан бер чама булып чыкты. Һәркайсы беренче булырга тырышты! Ниһаять, финиш сызыгын Рамил Рәхмәтуллин 4 яшьлек атында беренче булып үтте. Ул ярышта “Татарстан” хуҗалыгы исеменнән чапты. Аның артыннан ук бастырып Салават Бикбаев аты килде. Өченче нәтиҗәне Сабадан Рүзәл Рәхмәтуллин аты күрсәтте.
Дүртенче төркемдә чис-та токымлы 5 ат катнаш- ты. Шуның 3се – “Ак барс” агрокомплексы” атлары. Һәм тагын “Кырлай” агрофирмасы һәм Биектау атлары бар иде. Халык ярышны “Ах!” итеп, “Сөбханалла!” дия-дия карады. “Ак барс” агрокомплексы”ның “Илхан” кушаматлы 9 яшьлек аты иң көчлесе булып чыкты! Икенче нәтиҗә дә шушы хуҗалыкның “Викинг” кушаматлы 5 яшьлек атында булды. Алар артыннан “Кырлай” агрофирмасының “Эксклюзив–Автор” кушаматлы 8 яшьлек атында Радик Гарифуллин килде.
Соңыннан жиңүчеләргә һәм ярышта катнашучыларга акчалата бүләкләр тапшырылды. “Кырлай” агрофирмасыннан Радик Гарифуллин:
– Быел ат чабышы яхшы оештырылган, – дип сөйләде. – Безнең хуҗалык- та барысы 131 ат бар. Шуның 20ләбе чиста һәм ярым чиста токымлы атлар. Үзем атлар да карыйм, тренер да. Ат тоту ул чыгымлы эш. Яхшы токымлы атлар кыйммәт йөри, әнә, Татарстанның бер районында берәүнең 450 мең сумлык аты финиш биргән дә, егылып та үлгән. Призлы урыннарны алучыларның, ярыш- ларда катнашучыларның хезмәте гаделрәк бәяләнсен иде.
Румия Надршина