Сөбханалла әле, Михаил абый!

Сөбханалла әле, Михаил абый!
Район социаль яклау бүлеге җитәкчесе Илдус Әһлиев Апаз авылында яшәүче сугыш ветераны Михаил Әпсәләмовка, 90 яшьлек юбилее белән котлап, Россия Президенты Владимир Путинның Рәхмәт хатын тапшырды. Апаз авыл җирлеге башлыгы Ринат Садыйков та юбилярны котларга килде.
Сөбханалла, юбиляр үзе безне урамга чыгып каршы алды. Карчыгы Сәйдәбану вафат инде, улы Марс, килене Илмира, оныклары белән яши.
Михаил абый сугыш чорында Ерак Көнчыгышта “Советский Гавань” портында хезмәт иткән. Чикне саклаганнар, консерв заводында эшләгәннәр.
– Мин сугышка киткәндә әни, мескен, кеше өстендә калды, – дип сөйли Михаил абый. – Өебез иске иде, җимерелеп төште. Хатлар алышып тордык. Әни хатында тормышлар шундый авыр, ачлыктан үлүчеләр бар, дип язар иде. Чит җирләрдән туган авылга 1961 елны гына әйләнеп кайта алдым. Өйләндем, балалар үстердек. Тракторда эшләдем.
– Кешегә бер авыр сүз әйтә белмәс, шундый күндәм, йомшак күңелле кеше инде ул безнең Михаил абый, – ди Апаз авыл җирлеге башлыгы Ринат Садыйков.
– Әйбәт кеше булганга юбилеена табыннарны шулай матур итеп әзерләдек инде, – дип елмая килене.
Табын зәвыклы итеп әзерләнгән. Махсус савытларда чыгарылган шулпа белән өчпочмак телеңне йотарлык. Җиләкләр салып әзерләнгән каймак дерелдәвеген (желе белән ясалган), яшермим, Апазда беренче күрүем.
Илмира ханым авылда кибетче булып эшли, Марс механизатор булып эшләгән. Илмира бик матур итеп чәч тә кисә икән.
– Гадәттә кызлар егетне читтән эзли, сез үз авылыгыз егетен Марсны сайлагансыз, – дим Илмирага.
– Ул вакытта бик яшь идем, – ди Илмира. – Начар гаилә булса, әни бирмәс иде, әйбәт гаиләгә килен булып килдем.
Гомумән, Апаз ягы, район үзәгеннән ерак төбәкләрнең берсе булуына карамастан, мәдәни як. Шул турыда авыл җирлеге башлыгы белән дә сөйләштек. Җир, судан да киләдер ул мәдәнилек...
Өйләрен зурайтканнар. Гаилә ишле, бар да малайлар. Марат белән Илмир инде армия хезмәтен үтеп кайткан. Марат югары уку йортын тәмамлап, Апаз мәктәбендә инглиз теле укыта. Илмир Лесхозда һөнәр училищесында белем алганнан соң механизатор булып эшли. Алмаз быел 10нчы сыйныфны тәмамлаган.
...Михаил абый безне, капка төбенә чыгып, озатып калды. Күпне күргән буын. Үз әтисен белми дә. Әнисе Миңсылу улы белән хатыны үлгән бер кыз балалы кешегә кияүгә чыккан. Үги әти дә 1936 елда үлеп киткән. Өс-баш начар, суык, туңабыз, ашарга юк, дип искә ала ул сугыш чорын. Михаил абый 90да да йөреп торуы, бүгенге рәхәт тормышны күрә алуы белән бәхетле.
Румия Надршина