Лагерьлар балаларны җыйды

Лагерьлар балаларны җыйды
Быел каникулларда районда 33 җәйге лагерь эшләячәк. Барлыгы 1300 бала ял итәчәк.
– 26 мәктәп яны, 5 (Арчаның беренче, икенче, җиденче һәм Шушмабаш мәктәбендә, бишенче гимназиядә) ял һәм хезмәт лагерьлары, Шушмабашта палаткалы “Азимут” лагере оештырылды. Шушмабашлылар, строй һәм җыр бәйгесендә районда беренче урынны алып, республикада да уңышлы чыгыш ясадылар. Шуның өчен аларга палаткалы лагерь булдыру мөмкинлеге бирелде. Сеҗе мәктәбе базасындагы “Шатлык” лагере быел да өч сменада (15 июньнән, 6 һәм 29 июльдән) балаларны үзенә җыя, һәрберсендә 70 бала ял итәчәк. Анда барырга теләүчеләр бик күп, – ди район мәгариф идарәсе җитәкчесенең тәрбия эшләре буенча урынбасары Миләүшә Шакирова. – Ел дәвамында эшләүче стационар лагерь да оешса, район өчен бик яхшы булыр иде. Чөнки лагерьда бала яңа яктан ачыла, үсә һәм ныгый.
Шушмабаш урта мәктәбендә берьюлы өч лагерьны –“Күбәләкләр” мәктәп яны, ял һәм хезмәт, палаткалы “Азимут”–ачу тантанасы булды.
– Барлыгы 100 бала йөри. Теләге булганнарның барысын да алырга тырыштык. “Азимут”тагылар палаткаларда йоклап кала, калган икесендә балалар иртәдән көндезге 3кә кадәр шөгыльләнә. “Азимут”та – 5, мәктәп яны лагеренда – 3, ял һәм хезмәт лагеренда 3 тапкыр тукланалар. Төрле күңел ачу чаралары, бәйгеләр, уеннар һәм башкалар оештырыла, – ди мәктәп директоры Рәзилә Шәймәрданова.
– “Азимут”ка 20 бала йөри, – ди лагерь җитәкчесе Гүзәл Вафина. – Ул 7 көн дәвам итә. 11–13 яшьлекләр өчен. 6 тәрбияче. Биредә табигать кочагына җәяүле экскурсияләргә зур урын бирелә.
Ә ял һәм хезмәт лагерена йөрүчеләр мәктәп яны участогында эшләячәк. Шушмабаш мәктәбенең зур бакчасы бар. Анда 2000нән артык кәбестә, суган, кишер, баклажан, кыяр, баллы борыч, помидор, хәтта карбыз белән кавын да үстерелә.
– Татарстан Республикасының Авыл хуҗалыгы һәм азык–төлек министрлыгы тарафыннан үткәрелгән бәйгедә безнең мәктәп яны участогы 100 мең сумлык грант отты, район күләмендә җиңүләргә иреште, – ди Рәзилә Шәймәрданова. – Кыш буена ашханәдә балаларга ризыклар әзерләргә дә җитә, сатып, мәктәпкә әйберләр алу өчен акча да эшлибез.
Лагерьларны ачу тантанасы кызыклы да, күңелле дә үтте. Аннан чыгышлар башланды. Аз гына вакыт эчендә балалар җыр да, бию дә өйрәнгәннәр. Кыюлыкларына, осталыкларына сокланып утырдык. Алып баручылар Камилә Елисеева, Айгөл Фәттахова, Лилия Әхмәдуллина Казан телевидениесендә “Яшь ТНВ” тапшыруы дикторлары, җырчылар 2нче сыйныф малайлары, шулай ук беренче сыйныфтан Зәлия Таҗетдинова шунда “Тукай якташлары” исемле тапшыруда сәнгатьле укучылар икән. Соңыннан балалар, Робинзон утравына җыелып, Робинзон һәм Пятница командаларына бүленде. Кызыклы ярышлар, күңел ачулар башланды.
Гөлсинә Зиннәтова