Абсолют батыр

Абсолют батыр
Безнең халыкта Сабантуй батырларын элек–электән Олимпия чемпионнарына тиңләп хөрмәт иткәннәр. Быелгы Арча батыры Руслан Абдуллин белән дә райондашларыбызны якынрак таныштырып узыйк әле.
Руслан Арча егете, 1991 елда туган. Әнисе Илһамия Хәйретдин кызын күпләр тәҗрибәле педагог буларак белә. Ул 21 ел педагогика көллиятендә рус теле укытучысы, 7 ел завуч булып эшләде, инде 7 ел Арчаның 3нче мәктәбен җитәкли.
Көрәшче каны Русланга нәселдән бирелгән. Әтисе Рәфикъ туганнары Олы Мәңгәрдә дан тоткан нәсел.
— Потлы герләрне урыс капкасы аша чөеп уйнаганнар алар, — дип сөйли Илһамия ханым.
11 яшьтә әтисез калган Русланга тормыш арбасына бик иртә җигелергә туры килә. Мәктәпне тәмамлагач, Әтнә техникумында механик һөнәрен үзләштерә ул. Быел исә Казан дәүләт аграр университетының техник сервис факультетын тәмамлап, диплом алырга әзерләнә. Һөнәре буенча Арча ДОСААФ оешмасында производствога өйрәтү мастеры булып эшли.
Көрәш белән ул 13 яшьтән шөгыльләнә. Спорт төренең нечкәлекләрен өйрәткән тренеры Фәнис Зариповка, тормышта да, спортта да һәрвакыт ярдәм кулы сузарга әзер остаз Ринат Алеевка рәхмәтле Руслан. Нәселдән килгән сәләт, тырышлык үзенең нәтиҗәләрен бик тиз күрсәтә башлый. Руслан Абдуллин яшүсмерләр арасында берничә тапкыр Татарстан, ике тапкыр Россия чемпионы. Шулай да соңгы елларда ул келәмдә күренми башлаган иде. Сәбәбен сорагач:
— Бу спорт төренә районда игътибар кимегән иде. Менә яңа җитәкче көрәш белән кызыксына башлагач, мин дә мәйданга кайттым, — дип җавап бирде.
Узган ел район башлыгы призын откан Руслан республикада Муса Җәлил турнирында да район көрәшчеләре арасында иң яхшы күрсәткечкә иреште.
Саубуллашканда Русланның сәламәтлеге турында да сорадык.
— Финалда аягыңны авырттырдың, көндәшең гаебеме?
— Юк, әлбәттә. Көрәш ул травмаларсыз гына булмый инде. Илшатның монда бернинди дә гаебе юк. Зыянлы түгел, тазарыр әле, — диде батыр.
Батыр димәктән, ни хикмәт, Русланның җәмәгате Алинә дә (ул Арчада йөрәк–кан тамырлары авырулары үзәгендә шәфкать туташы) легендар көрәшче Әхәт батыр нәселеннән. 9 айлык кызлары Әминә дә, сөбханалла, бик тере күренә.
— Танышлар безнең малай туганны бик көтәләр инде. Ике көрәшче каны кушылгач, нәрсә булыр икән дип кызыксыналар, — ди Алинә.
Руслан көрәш батыры гына түгел, оста баянчы, алтын куллы тимерче дә икән әле. Көнбатыш бистәсендәге йортларын да үзе салып чыккан, хәтта бизәкле капкасына кадәр үзе ясаган. Афәрин, Руслан дип кенә әйтәсе кала! Без барлык райондашлар исеменнән сине районның абсолют батыры булып калуың белән котлыйбыз, тизрәк савыгып, көрәш мәйданнарында яңа җиңүләр яулавыңны көтеп калабыз.
Исрафил Насыйбуллин