Күңелләрдә тулы өметләр

Күңелләрдә тулы өметләр
Эш беткәч, уйнарга ярый, дигәндәй, Сабантуйлар, гадәттә, язгы чәчүләр тәмамлангач үткәрелә. Халкыбызның әлеге гүзәл бәйрәмендә беренче чиратта кыр батырлары мәйдан уртасына чакырылып хөрмәт ителә, чөнки икмәк булса, җыр да була.
Сабантуйлар алдыннан район комиссиясе, һәр хуҗалыкта булып, чәчүлекләргә бәя бирде. Механизаторларыбыз, җитәкчеләр, белгечләр тарафыннан гаять зур хезмәт куелган. Әлегә бар да әйбәт, яңгырлар да вакытында явып, җил дә вакытында исә. Басуларга, яшел хәтфә булып күтәрелгән игеннәргә карап куанасың.
Төгәлләнгәч
буразнада эшләр,
Салынгач та соңгы
бөртекләр —
Татар чыга шулай
мәйданнарга,
Күңелләрдә тулы
өметләр.
Район Сабантуенда яңгыраган әлеге шигъри юллар тирән мәгънәгә ия — барыбызның да күңелләрендә иң матур теләкләр генә! Ямьле җәйләр, мул уңышлы көзләр килсен, дөньялар тыныч, күгебез аяз булсын!
— Безнең матур, күңелле һәм юмарт бәйрәм авыл хезмәтен данлый, шуңа күрә Сабантуйда без үзенең фидакарь эше белән өстәлләребездәге муллыкны тәэмин иткән, районның уңышлы үсешенә өлеш керткән кешеләрне хөрмәтлибез, – диде районыбыз җитәкчесе Илшат Нуриев үзенең котлау сүзендә.
2015 елның район Сабантуе флагын узган елның кыр батыры, “Кырлай” ширкәте механизаторы Данил Рәхимов белән 2014 елның абсолют батыры Илшат Идиятов күтәрделәр.
Россия Федерациясе Пенсия фондының Татарстан Республикасы буенча Идарәсе җитәкчесе Марсель Имамов Татарстан Республикасы Президенты вазыйфаларын вакытлыча башкаручы Рөстәм Миңнехановның арчалыларга Сабантуй котлавын җиткерде.
Татарстан Республикасы Дәүләт Советы депутаты Рауль Рәхмәтуллин тәб- рикләү сүзләре әйтте.
Район Сабантуеның мөхтәрәм кунаклары традиция буенча колгага сөлгеләр бәйләделәр.
Сабантуй мәйданына сабан батырлары чакырыла. Район җитәкчесе Илшат Нуриев 2015 елның язгы кыр эшләрендә иң югары нәтиҗәгә ирешкән “Кырлай” ширкәте механизаторы Данил Рәхимовка “Кыр батыры – 2015” дип язылган тасма, Мактау дипломы, акчалата премия тапшырды.
“Ватан” ширкәтеннән Әхтәм Шәвәлиев – икенче, “Северный” ширкәтеннән Фәнис Вәлиуллин өченче урыннарны яуладылар. Алар да Илшат Габделфәртович кулыннан бүләкләр алды.
Шулай ук мәйданда “Һөнәре буенча иң яхшы” исеме алган алдынгылар, ярминкәләрне иң яхшы оештыручылар, Бөек Җиңүнең 70 еллыгы уңаеннан игълан ителгән сәхнә бәйгесендә җиңүчеләр, спорт өлкәсендә иң көчлеләр һ.б. бүләкләнә.
Сабантуй җитезлеккә, осталыкка, булганлыкка сынау да ул. “Президент белән бергә” хәрәкәте Сабантуй бәйрәмен әзерләүдә актив катнашты. Татарстан районнарында, шул исәптән Арча районында да, бәйрәмне үткәрү вакытында хәрәкәт “Спорт сөюче Татарстан” дигән үз мәйданчыгын оештырды. Әлеге мәйданчыкта ГТО нормаларын тапшыру буенча үз көчеңне сынап карарга мөмкин иде. Район җитәкчесе Илшат Нуриев та шунда. Ул районда көрәш, хоккей һәм спортның башка төрләрен үстерүгә зур игътибар бирә. Үзе дә актив спортчы.
“Президент белән бергә” хәрәкәте активистлары халык арасында сәламәт яшәү рәвешен һәм спорт белән шөгыльләнүнең мөһимлеген пропагандалауга зур игътибар бирәләр. Татарстан бүген Россиянең профессионаллар өчен дә, һәвәскәрләр өчен дә спорт белән шөгыльләнә ала торган иң яхшы инфраструктуралы спорт башкаласы. Респуб- ликага Россиянең генә түгел, ә дөнья дәрәҗәсендәге иң эре спорт ярышларын да үткәрүне ышанып тапшыралар. Инде быелгы җәйдә спортның су төрләре буенча гаять зур халыкара чемпионат үтәчәк, ә 2018 елда Татарстан футбол буенча дөнья чемпионаты этабын кабул итә.
Ильяс Фәттахов