Ел әйләнәсе эшләсәң генә

Ел әйләнәсе эшләсәң генә
Әңгәмәдәшебез – район мәгариф идарәсе җитәкчесе Зөлфәт Дәүләтбаев.
– Зөлфәт Миңнефәрович, балаларның җәйге каникуллары башланса да, мәгариф системасында эшнең иң кызган вакыты.
– Әйе. Дәүләт имтиханнары төгәлләнү алдында, җәйге лагерьлар эшли, мәктәпләр ныклап төзекләндерелә, яңартылган 3нче мәктәп төзелә, хоккей сыйныфлары туплана, яңа балалар бакчалары салына.
– Арчаның 3нче мәктәбе язмышы белән күпләр кызыксына.
– Милли мохитле, сәләтле балалар мәктәбе булачак ул. Яңа уку елында ачылачак. Биредә татар, рус, гарәп, инглиз һ.б. телләр өйрәтеләчәк. Мәктәптә иң яхшы укытучылар укытачак һәм сәләтле балалар төрле яклап үсәчәк. Шулай ук бу мәктәптә тәрҗемәче дәрәҗәсенә җитәрлек белгечләр әзерләнәчәк. Әлеге мәктәп педагогика көллияте һәм берничә Казан шәһәренең югары уку йортлары белән хезмәттәшлек итәчәк. Әлеге мәктәпне нинди итеп күрәселәре килү турында ата-аналар, җәмәгатьчелек фикерен дә беләсе килә. Бу турыда мәгариф идарәсенә язып җибәрсеннәр иде.
– Сәләтле балаларны үстерү мәсьәләсе ничек хәл ителә?
– Сәләтле балалар белән уку чорында гына түгел, ел әйләнәсе эш алып барыла, җәй көннәрендә дә укытучылар бу юнәлештә эшләрен туктатмый. Узган уку елында татар теле һәм рус теле буенча олимпиада нәтиҗәләре әйбәт булды. Әмма әлеге юнәлештә күп хезмәт куясы бар әле.
– Районда сәләтле балаларны хөрмәтләү тантанасында район җитәкчесе балаларның ел буе эшли торган ял һәм белем лагере булачагы турында әйткән иде.
– Бу лагерьны булдыру буенча эш башланды. Аның өчен иң кулай урын – Яңа Кырлай. Сәләтле балалар белән эшләү өчен дә лагерь әйбәт булачак.
– Ата-аналарны хоккей сыйныфлары кызыксындыра.
– Быел, дөрестән дә, 1 сентябрьдән Арчада Боз сарае төзелүгә бәйле рәвештә 5нче гимназиядә 1нче сыйныфтан башлап хоккей сыйныфлары оешачак. Районда көчле хоккей командаларын булдыру, рес- публикага үзебезнең яхшы хоккейчылар тәрбияләп бирү максатыннан эшләнә бу. Сәләтле спортчыларны Россия һәм, хәтта, чит илләр дә күреп алачак! Спорт ул баланың чын кеше булып өлгерүе өчен дә бик әйбәт. Бала кечкенәдән тәртип дигән нәрсәне белеп, тырыш хезмәт белән, аның нәтиҗәсен тоеп үсәчәк.
– Баланың, хоккей белән генә шөгыльләнсә, укырга вакыты калырмы?
– Әлбәттә, балаларның төп эше уку булачак. Алар, якшәмбедән кала, көн саен 1–1,5 сәгать хоккей белән шөгыльләнәчәк. Хоккей сыйныфларына иң яхшы укытучыларны җәлеп итәчәкбез. Укучылар көн дәвамында ике тапкыр кайнар ризык белән тукланачак. Боз сараена автобус йөртәчәк. Бассейнга, хореография түгәрәгенә йөриячәкләр.
– Бердәм дәүләт имтиханнары нәтиҗәләре ничек?
– Әлегә билгеле булган нәтиҗәләр уртача рес- публика күрсәткеченнән югарырак. Шунысы куанычлы, 11нче сыйныфны тәмамлаучылар арасында имтихан тапшыру кагыйдәләрен моңарчы бер генә бозу очрагы да булмады, ата-аналар ягыннан да хәвефләнүләр күзәтелмәде. Минемчә, дәүләт имтиханнарын кат-кат алдан биреп карау әһәмиятле. Быел шулай эшләдек тә. Бу баланы психик яктан ныгыта һәм укучы, имтиханга үз белеменә инанып, тынычрак күңел белән бара. 1 сыйныфтан башлап, көн дә дәрескә ныклап әзерләнеп, белем тупласаң гына БДИны курыкмыйча уңышлы тапшырып була. Бала, укытучылар, ата-аналар алдында торган төп бурыч бу.
Румия Надршина