Авыл җанланды

Авыл җанланды
Быел Казанбаш авылы җыены авылдашларын гына түгел, район халкын җыйды сыман. Көн кояшлы, кеше күп, балалар өчен күңел ачу чаралары бихисап.
Җыенга Казаннан кайткан эстрада һәм театр артистларының чыгышы аеруча ямь өстәде. Нинди генә уеннар юк иде! Җиңүчеләргә бүләкләр дә мулдан булды.
Авыл халкы шушындый бәйрәм оештырганнары өчен иганәчеләргә, аеруча Рамил Әхмәтгалиев белән Фәнис Мөсәгыйтовка зур рәхмәтле. Чөнки җыен уздыру идеясен күтәреп алып, оештыру эшләрен башлап йөрүдә аларның хезмәте чиксез. “Авыл тарихында мондый бәйрәмнең булганы юк иде әле, — ди Фәния Исхакова. — Бар җирдә күңеллелек, балаларга да уеннар бик күп. Авыл халкының кайсы белән генә сөйләшсәң дә, канәгатьләнүен белдерә. Авылдашларым исеменнән, көче кергән һәркемгә зур рәхмәтебезне белдерәбез”. Ел саен мондый бәйрәмнәрнең үзәгендә кайнаган, җыр–биюдә, уеннарда катнашкан Гүзәлия Мөсәгыйтова быел тамашачы буларак катнаша. Бәйрәмнең яхшы оештырылуы, авылдаш егетләре турында ул да горурланып сөйли.
Иганәчеләрнең исемнәрен санап бетерерлек түгел, гомумән, кемнең тормыш юлында Казанбаш авылы үз эзен салган – шулар. Мәсәлән, авылда туып–үсеп, тормышта үз юлын табып, ныклы адымнар белән атлаучы егетләр, кайчандыр Казанбашта практика узган, эшләп киткәннәр, җирлек депутаты, авылның кадерле кияве булып яшәүче районда дәрәҗәле шәхесләр. Аларга атап “Казанбаш” җыры авторы Дамир Шакирҗанов түбәтәйләр алып кайткан.
Авыл халкы мондый бәйрәмнәрнең ел да булуын тели. Булыр, әлбәттә, авыл өчен янып–көеп йөрүче уллары булганда авылга элеккеге җанлы вакытлары кайтмый калмас.
Розалия Зиннәтова