Танк пьедесталда урын алды

Танк пьедесталда урын алды
Район җитәкчесе Илшат Нуриев инициативасы белән Бөек Җиңүнең 70 еллыгы уңаеннан кечкенә авылларда да Бөек Ватан сугышында һәлак булганнар истәлегенә һәйкәлләр торгызылды.
12 июньдә Симетбашта Татарстан Республикасы Дәүләт Советы депутаты, “Таттелеком” акционерлык җәмгыяте генераль директоры Лотфулла Шәфигуллин ярдәме белән Бөек Җиңүнең символы булган дәһшәтле корал–танк мәңгелек тыныч пьедесталга урнаштырылды. Авылдагы бу урынны мемориаль комплекс дип атарга да була. Яу кырында һәлак булган авылдашлар исемнәре язылган обелискның бер ягында “ДТ–54” тракторы булса, икенчесендә СССРда эшләп чыгарылган “Т–80 БВ” танкы.
– Бүген без Россия көнен билгеләп үтәбез. Аның киләчәге безнең һәм сезнең кулда, халыклар бердәмлегендә. Мин үземнең Россиядә яшәвем белән горурланам, – диде яшьләргә мөрәҗәгать итеп район җитәкчесе Илшат Нуриев. – Шушы тыныч тормышны безгә бүләк итү өчен башларын салганнарның исемнәрен мәңгеләштерү өчен быел күп эш башкарылды. 11 обелиск ачылды. Монысы – уникенчесе. Геройлар батырлыгын күңелләрдә яшәтергә кирәк.
Тантанага Симетбаш авылының олы терәге, аңа һәрвакыт ярдәм итеп яшәгән, авыл халкы тормышын кайгырткан “МТС” ачык акционерлык җәм- гыятенең Татарстан Рес- публикасы буенча филиал директоры, “ТВТ” телерадиокомпаниясе генераль директоры Марат Шакиров та кайткан иде.
– Симетбаш авылыннан гына да сугышка 75 кеше киткән, 34е кире әйләнеп кайтмаган. Исәннәр арасыннан да бүген бер генә ветеран – Габдрахман Сафин калды. Трактор тылда сугыш өчен, дип батырларча эшләгән тыл каһарманнарын (алар 156 кеше) искә төшерсә, танк сугыш елларын күз алдына китерергә мөмкинлек бирә. Алар исеме мәңге безнең хәтергә уелып калачак, – диде ул.
– Алар алып килгән тынычлыкны сакларбыз һәм яшь буынга тапшырырбыз. Танк, җиңү символы буларак, һәйкәл булып кына торсын, – дип өстәде район хәрби комиссары Алмаз Борһанов. – Бу яшьләр өчен бик зур пат- риотик тәрбия чарасы да.
Радик Хәйретдинов башкаруындагы “Солдатлар” җыры тантанага аерым бер аһәң өстәде, күңелләрне тетрәндерде. Һәлак булганнар истәлегенә чәчәкләр куелды.
– Мин үзем тракторда да, комбайнда да, аннан озак еллар шофер булып эшләдем.Симетбаш авылы башында ук шундый һәйкәлләр торуы күңелгә бер рәхәтлек бирә. Без, авыл халкы, Лотфулла Шәфигуллин һәм Марат Шакиров кебек танылган шәхесләребез булуы белән бәхетле. Лотфулла авылга юл салды, буа ясады, зиратны койма белән әйләндереп алды, клубны эшләүдә ярдәм итте, ут баганаларын карады. Без аңа мең–мең рәхмәтле, – диде тыл ветераны Шамил Гарипов.
– Яшьләрне тәрбияләү өчен дә яхшы чара ул. Алар барысын да күрә, белә. Аннан авыл бетми, шунысы бигрәк тә сөендерә, – диде бик күп еллар җил тегермәнендә эшләгән, балта остасы булган тыл ветераны Таһир Мифтахов.
Әйе, үсеп килүче яшь буын өлкәннәрдән килгән эстафетаны дәвам итәргә тиеш. Чөнки илнең киләчәге, иминлеге алар кулында. Ә моның өчен рухи һәм физик сәламәт булу сорала. ГТО нормаларын тапшыруның әйләнеп кайтуы да шуны күз алдында тота. Биредә дә тантанага җыелган яшьләр ГТО нормаларын тапшырды. Аны районның яшьләр эшләре, спорт һәм туризм бүлеге, волонтерлар, форпостчылар, балигъ булмаганнар белән эшләү комиссиясе белән берлектә “Президент белән бергә” хәрәкәте активистлары оештырды. Яшьләр белән бергә нормативларны ул көнне район җитәкчесе Илшат Нуриев һәм ЗУЭС җитәкчесе Рөстәм Гомәров та тапшырды. “Бердәм Россия” сәяси партиясенең җирле бүлекчәсе яшь гвардиячеләре, Россия көне белән котлап, Бөтенроссия буенча үткәрелгән “Триколор” акциясе кысаларында һәр кешенең кулына тасма бәйләде.
Гөлсинә Зәкиева