Балалар ял итә

Балалар ял итә
Татарстан Президенты Рөстәм Миңнеханов һәм район җитәкчелеге балаларның, яшьләрнең ялын оештыру, сәламәтлекләрен ныгыту өчен тиешле шартлар тудыруга зур игътибар бирә. Республика Президентының үзенчәлекле 30 программасының берсе нәкъ менә шуңа юнәлтелгән дә.
Илдә кризис булуга карамастан, барлык программаларның финанслануы әһәмиятле.
Районда җәйге мәктәп яны лагерьлары, Сеҗедәге “Шатлык” лагере, Шушмабашта палаткалардагы ял, шифаханәләр, Анапа, Кырым, Туапсе – бар да балалар өчен.
– Районда балаларның җәйге ялын оештыру өчен республика бюджетыннан барысы 5 млн. 625861 сум акча каралган, – дип сөйли район мәгариф идарәсе җитәкчесе урынбасары Миләүшә Шакирова. – Кризис безгә кагылмады.
– Мәктәп яны лагеренда ял итәргә теләге булган бер генә баланы да кире бормадык, – ди Арчаның 2нче мәктәбе лагере җитәкчесе Ләйсән Галимова. – 1 сыйныфтан алып 6нчы сыйныфка кадәр барысы 90 бала ял итә.
Балаларның үзләре белән сөйләшик әле. Күренеп тора, кәефләре шәп!
– Сезгә монда ошыймы? – дип сорыйм.
– Ошый! – дип җавап бирде алар бертавыштан.
– Бигрәк тә нәрсә ошый?
– Ашханә!
Һәм берсен-берсе бүлә-бүлә санап киттеләр:
– Төрле спорт уеннары, конкурслар, рәсем ясау, Арча стадионы, китапханә, сабантуй, шашка, шахмат уйнаулар, дөрес итеп юлда йөрергә өйрәнүләр...
Менә бүген дә алар белән түгәрәк өстәл артында кызыклы сөйләшүләр үткәрелде. Район балигъ булмаган балалар белән эшләүче комиссия сәркатибе Лилия Завялова, “Мәрхәмәтлек” үзәгенең гаилә һәм балалар бүлеге социаль хезмәткәре Нурсөя Дәүләтшина балалар белән балаларча сөйләшеп, урамда велосипедны ничек югалтмас- ка, су коенырга бары тик әти-әниләр белән генә йөрергә, чит кешеләрдән конфет, сагыз алмаска, чөнки алар эчендә наркотик матдәләр булуы ихтимал, андый очраклар бар, наркотик матдәләрне кулланырга ярамаганлык, гаиләдә тынычлык булмаса, әти-әниләр кул күтәрсә, кемгә мөрәҗәгать итәргә кирәклеге турында сөйләделәр, буклетлар өләштеләр, наркотикларның аяныч хәлгә китерүе турында видеоролик күрсәттеләр.
Әле кайчан гына социаль яклау бүлеге яныннан зур автобус белән балалар Мари Иленә шифаханәгә чыгып киткән иделәр. Озатучы әти-әниләр арасында Шурабаштан 5 балалы Зөлфия белән Газинур Һадиевлар да бар иде.
– Мари Иленең “Кооператор” шифаханәсендә ике кызыбыз ял итеп кайтты, – дип сөйләде Зөлфия Һадиева. – Балалар шифаханәләрне бик ярата.
– Төрле шифаханәләрдә һәм лагерьларда быел барысы 329 бала бушка ял итәчәк, – диде район социаль яклау бүлеге белгеч-эксперты Гөлнара Фәйзрахманова. – Узган ел 272 бала сәламәтлекләрен ныгытты. Чыгымнарны республика бюджеты күтәрә.
Балалар ялына кризис комачауламавы куандыра.
Румия Надршина