Анда булганың бармы?

Анда булганың бармы?
Сеҗе мәктәбе базасында урнашкан “Шатлык” лагере җәйге каникул чорында беренче смена балалары өчен 15 июнь көнне ишекләрен ачты. 2 июльгә кадәр биредә 9 яшьтән 12 яшькә кадәрле 70 бала ял итәчәк. Аннан 21 көнлек һәм бер атналык тагын ике сменаның килүе көтелә.
— Балаларның җәйге ялын оештыру Президент программасы буенча үтә. Беренче сменада балаларның иҗади сәләтен үстерүгә, Тукай иҗатын тирәнтен өйрәнүгә басым ясалса, икенче сменага олимпиадалар, төрле ярыш–бәйгеләрнең җиңүчеләре җыела. Ә өченче смена балаларының ялы инглиз телен өйрәнү, баету, аралашуга корылачак, — ди район мәгариф идарәсе җитәкчесе Зөлфәт Дәүләтбаев.
Ял итүче балаларның куанычы, канәгатьләнүе йөзләренә чыккан. Араларында инде берничә ел рәттән килүчеләр дә бар. Мәсәлән, Арчаның 1нче мәктәбенең 7 сыйныфында белем алучы Карина Шәйхелисламова белән аның 9 яшьлек сеңлесе Диләрә. “Без икенче ел киләбез бирегә. Бик ошый, монда киләсе көннәребезне кыштан ук саный башладык инде. “Шатлык” — бик күңелле лагерь. Көн саен нинди дә булса яңалык, яңа темалар өйрәнәбез, төрле күңелле конкурслар була, тәмле ашаталар. Сагынырга вакыт та юк, буш вакытлар калмый. Әти–әниләребез белән телефон аша аралашып торабыз. Минем моңа кадәр “Ливадия” лагеренда ял иткәнем бар иде. Әмма андагы тормыш “Шатлык”тагы күңеллелеккә җитми”, — ди Карина.
Чыннан да, бик күңелле биредә. “Җәй — балалар территориясе” дигән программа кысаларында һәр көн нинди дә булса файдалы гамәлгә, өйрәнүгә корылган. Лагерь ишеген кыюсыз гына ачып кергән бала кайтканда инде үз–үзенә ышанган, шактый яңалык үзләштергән, дөньядагы яшүсмерләр тормышыннан әллә никадәр мәгълүмат туплаган кеше була. Моның өчен вожатыйлар бик тырыша. Ә вожатыйлары — үзләреннән берничә яшькә генә өлкән, яшьләр тормышында кайнап яшәүче Арча Укучылар сарае каршында эшләп килүче “21 гасыр яшьләре” клубы әгъзалары, тәрбиячеләре — Яңа Кенәр Укучылар йорты хезмәткәрләре. Алдагы сменаларда балалар белән Арча педагогика көллияте студентлары эшләячәк.
Лагерьны рәсми рәвештә ачу тантанасы балалар җыелып берничә көн узгач булды. Үзләре шулай теләгән. Чөнки тантанага кадәр дуслашып бетәсе, бергәләп җыр–биюләр өйрәнәсе бар бит. Әлбәттә, тырышлыкның нәтиҗәсе күз алдында — тантанага килүчеләргә сәламләү, реклама күрсәтү кебек күренешләрне отрядлар берсен–берсе узып ярышып тәкъдим итте.
“Шатлык”тагы балаларны көн саен бер сюрприз — күңел ачу чарасы көтә. Ялларын онытылмаслык итеп үткәрү өчен пешекчеләрдән башлап, вожатыйлар, тәрбиячеләр, оештыручылар, җитәкчеләр бар көчләрен куя. “Шатлык”тагы һәр көн шатлыклардан гына торсын!
P.S. Район мәгариф идарәсе җитәкчелеген дә, әти–әниләрне дә күптән бер сорау борчый: Арча җирендә стационар лагерь булырмы? “Бу юнәлештә Мәгариф һәм фән министрлыгында да эш алып барыла. Ул финанска бәйле, — ди Зөлфәт Дәүләтбаев. — Бу лагерьны Яңа Кырлай территориясендә — Тукай җирендә күзаллыйбыз”.
Розалия Зиннәтова