Эшмәкәр, йокың тынычмы

Эшмәкәр, йокың тынычмы
Арча һәм Әтнә районнары буенча Пенсия фондына тиешле взносларны түләмәгән эшмәкәрләрдән бирәчәкләрен (8 млн. сумга якын) эзләп алу буенча айлык үткәрелде. Шушы чорда Пенсия фонды вәкилләре, суд приставлары, журналистлар белән 6 рейд үткәрелде. 408 мең 95 сум акча эзләп алынды.
Районда 828 эшмәкәр исәпләнсә, шуның 107сенең (исәптән төшкәннәре белән бергә 234) Пенсия фондына бирәчәге бар.
— Шәхси эшмәкәр эшчәнлеген башлап җибәргәнсең икән, квартал саен взносларны түләргә кирәк, — дип кисәтә район Пенсия фонды идарәсе җитәкчесе урынбасары Гөлназ Ибәтуллина. — Вакытында исәп–хисапны өзмәсәң, пеня салына башлый, бирәчәк арта бара.
Шәхси эшмәкәрлекне башлап җибәрүчеләрне беренче вакытта взнослардан азат итсәләр — монысы хөкүмәтебез тарафыннан зур ярдәм булыр иде. Әмма әлегә мондый закон юк.
— Бирәчәге булган эшмәкәрләрнең яртысын диярлек табып булмый, — дип сөйли район Пенсия фонды идарәсе бүлек җитәкчесе Марат Рәхмәтуллин. — Теркәлгән адресы буенча өенә барабыз, ә ул анда яшәми булып чыга. Хәтерегездәдер, беркайда да эшләмәүчеләргә хөкүмәт шәхси эшмәкәрлек эшен ачуга 58 мең сумлап акча бирде. Аларның күбесе взнослар түләргә кирәклекне әллә белми, әллә бу турыда оныттылар, белеп тә түләргә мөмкинлекләре юкмы, түлиселәре килмиме?
Соңгы рейдларның берсендә бер эшмәкәрне эзләп Күпербашка төштек. Капкада зур йозак. Без эзләгән эшмәкәр монда яшәми булып чыкты.
— Бәлки ул шәхси эшмәкәр эшчәнлеген алып та бармый торгандыр, шулай булганда, салым инспекциясеннән һәм Пенсия фондыннан тиз арада исәптән төшәргә кирәк, — дип киңәш итә район Пенсия фонды идарәсе юристы Эльмир Мөхәммәтшин. — Бу алга таба взнос түләүдән коткарачак. Әмма җыелган бирәчәкне барыбер дә түләргә туры киләчәк.
— Бирәчәкне түли алмаганнарның яхшы хәлдәге телевизорына, суыткычына һ.б. шәхси милкенә арест салабыз, — дип аңлата суд приставы–башкаручысы Рина Курмаева. — Заказлы хатны алганнан соң, 5 көн эчендә түләмәсәләр, бирәчәкнең 7 проценты күләмендә хөкүмәт файдасына штраф салына.
Мөндештә яшәгән эшмәкәр, рейд бригадасы килеп кергәч, бик уңайсызланды. Суд приставына акча янчыгыннан тиешле сумманы җыеп бирде.
— Бер айга газ, утны да кертеп, түләүләр 50 мең сумлап җыела, — диде ул. — Бирәчәк булгач, юньләп йоклаган да юк. Эшмәкәрлекне ябасы булыр инде.
Арча станциясендә яшәүче эшмәкәр без килгәндә салмыш иде.
— Минем территориягә керергә сезнең ни хакыгыз бар! — дип дәгъва белдерде ул. Аның белән сөйләшеп торудан мәгънә юк иде. Айныгач сөйләшерләр.
Ә бер апа бирәчәге булган ир уртасы улы өчен (аерым яшиләр) оялды, борчылды.
— Пенсиямнән ай саен үзем түләп барырмын, — диде ул.
Румия Надршина