Тагын сигез йорт яңартыла

Тагын сигез йорт яңартыла
Күпфатирлы йортларны ныклап төзекләндерү программасы буенча эш 2015 елда да дәвам итә.
– Быел районда күп фатирлы йортларны ныклап төзекләндерү программасына 8 йорт керде, – ди торак-коммуналь хуҗалыгы, энергетика һәм элемтә буенча сектор мөдире Илфат Рәхимов. – Шуларның дүртесен (Зәйнуллин урамындагы 3, 4нче, Комсомол урамындагы 16нчы, Жуков урамындагы 2нче йортлар) июнь аенда тапшырырга планлаштыралар, калганнарында (Горький урамындагы 9нчы, Кирпеч урамындагы 27нче, Комсомол урамындагы 29нчы, Күпер урамындагы 9нчы йортлар) әле эш бара. Подрядчиклар “Икстрой”, “Водоканал–Сервис”, “Энергосервис”, “Строй–Мастер” ширкәтләре.
Узган атнада шәһәр башкарма комитеты җитәкчесе Рафил Исмәгыйлев, Илфат Рәхимов, капиталь төзелеш һәм архитектура бүлеге җитәкчесе Рәис Шәйдуллин, идарәче компания җитәкчесе Фәрит Зәйнуллин әлеге йортларны карап чыктылар, аларда эшнең барышы белән кызыксындылар, булган кимчелекләрне бетерергә куштылар.
Комсомол урамындагы 16нчы йортның түбәсе ябылган, җылытылган, төтен юллыклары каралган, подъездлар буялган, мәйданчыкларына плитәләр җәелгән, электр чыбыклары алыштырылган, тәрәзә рамнары буялган, тышкы яктан сайдинг белән әйләндереп алынган.
– Өске каттагылар салкын дип зарлана иде. Бу проблема хәл ителде. Тик менә дүртенче подъездга су начар килә. Сәбәбен белеп, бу мәсьәләне дә хәл итсәгез иде, – диде йорт буенча җаваплы Гәүһәрия Әһлиева.
Комсомол урамы, 29нчы йортта яшәүчеләр түбәдән су үтүдән зарланган булган.
– Түшәмне җылыттык, түбәне яптык, – ди “Икстрой” ширкәте мастеры Илнур Әсхәдуллин. – Яңгырда берничә мәртәбә тикшереп карадык – хәзер су үтми. Тик әлегә биредә шул түбә генә эшләнде. Подъездларны төзекләндерәсе, канализация челтәрен, подвал тәрәзәләрен алыштырасы бар.
Маршал Жуков урамындагы 2нче йортка да төзекләндерү кирәк булган.
– Яңгыр яуганда түбәдән су үтеп, стена буйлап агып утыра иде. Бу мәсьәлә хәл ителде. Подъездлар да матур, чиста булды. Рәхмәт. Тик, зинһар, подъезд ишек төбен дә карый күрегез, – дип мөрәҗәгать итте Зәйтүнә Сәмиева. – Яңгыр яуганда подъезд ишек төбе ерып йөри алмаслык пычрак була.
Зәйнуллин урамы, 3, 4нче йортлар тапшыруга әзер инде, ә Горький урамы, 27нче йортта әле эш күп. Кирпеч урамы, 27нче йортка да төс кергән. Ул заманында “Арча МСО”сы ширкәте кирпеч заводы конторасы булган, аннан аны йортка әйләндергәннәр, кешеләргә фатирлар биргәннәр. Шуннан бирле төзекләндерелгәне булмаган. Хәзер түбәдәге шифер алышынган, подъездлар каралган. Күпер урамындагы 9нчы йортта да төзекләндерү эшләре башланган.
– Йортны сайдинг белән тышладылар, ә үз исәбебезгә җылыттык. Җилләткеч рәшәткәләренә кадәр үзебез алдык. Кирәкле материалларны да машина яллап, үзебез алып кайттык, – дип зарланды “Надежда” ширкәте җитәкчесе Ибраһим Сабиров. – Подъездларда да эш күп, кимчелекләр дә җитәрлек. “Строй–Мастер” ширкәте төзекләндерүгә игътибарны арттырсын иде.
Комиссия дә сыйфат буенча шактый кимчелекләр тапты, июль ахырына кадәр аларны бетерергә кушты.
– Күпфатирлы йортлардагы фатирларның барысы да диярлек анда яшәүчеләрнең шәхси милке. Шуңа карамастан, хөкүмәт аларны төзекләндерергә акча бүлеп бирә, – ди Рафил Исмәгыйлев. – Хәзер аларга карап торуы ук күңелле.
Гөлсинә Зәкиева