Хәтерләрне яңарта торган көн

Хәтерләрне яңарта торган көн
Шекә авылында яшәүче Хәбир ага Кәримов Бөек Ватан сугышы башланган көнне яхшы хәтерли. 1941 елның 22 июнендә аңа 16 яшь тула.
— Сугыш башлануга әтине фронтка алдылар, — ди ул. — 1942 елда әни үлде, дүрт бала калдык.
1943 елның гыйнварында Хәбиргә дә чират җитә. Иптәш егете Ризван Мөхәммәтҗанов белән бергә китәләр. Өйрәтүләрдән соң Балтыйк фронтына озаталар, Хәбир снайпер була. 1944 елның 31 гыйнварында фронтның алгы линиясендә каты яралана, бер аягын кисәләр. Госпитальләрдә 8 ай ятканнан соң Арчадан Шекәгә кадәр култык таяклары белән җәяүләп кайта.
Ветеранның тыныч тормыштагы фидакарьлеге дә батырлыкка тиң. Озак еллар хисапчы булып эшли, Бибирәшидә апа белән 11 бала үстерәләр, 20 оныклары, 24 оныкчыклары бар.
Хәбир аганы юбилее белән котларга район башкарма комитеты җитәкчесе Илшат Нуриев килде. Ул аңа Россия Президенты Владимир Путинның Котлау хатын, бүләк тапшырды.
“Северный” ширкәте җитәкчесе Рөстәм Хәйруллин, Шушмабаш авыл җирлеге башлыгы Вәзир Сәгыйтов, Шушмабаш урта мәктәбе коллективы вәкилләре дә матур итеп котлап, бүләкләр тапшырдылар.
Илебез азатлыгы өчен гомерләрен, сәламәтлекләрен аямыйча көрәшкән ветераннарыбыз әнә шундый хөрмәттә бүген. Район җитәкчесе Илшат Нуриев 22 июньдә Хәтер һәм кайгы көне уңаеннан үткәрелгән митингта да бүгенге тыныч тормышыбыз, аяз күгебез өчен көрәшкән якташларыбыз истәлеген кадерләп сакларга, яшь буынны алар үрнәгендә тәрбияләргә чакырды.
Бөек Ватан сугышына районыбыздан 25 меңнән артык кеше китә, аларның 14 меңгә якыны әйләнеп кайтмый. Кайгы җиле һәр гаиләгә диярлек кагылып үтә.
Сугыш еллары баласы, мөхтәрәм ветераныбыз Илдус Сәгъдиев үзенең чыгышында 5 млн. сугышчының бүгенге көндә дә хәбәрсез югалганнар исемлегендә булуына борчылып сөйләде. Аларның язмышы билгесез, күпме солдатларыбызның сөякләре сугыш кырында күмелмичә аунап ята. Аларны эзләү, җирләү дәүләт күләмендә оештырылырга тиеш.
Татарстан Республикасы хәрби комиссариатының Арча һәм Әтнә районнары буенча бүлек җитәкчесе Алмаз Борһанов ата–бабаларыбызның Ватан алдындагы изге бурычларын намус белән үтәүләрен, аларның батырлыгы, истәлеге мәңгелек булуын әйтте.
Алмаз Борһанов бу юнәлештә үзе дә күп эшли, быел ике тапкыр мари урманнарындагы Сослангерга барып анда гомерләре өзелгән райондашлар истәлегенә һәйкәл куйдылар. Педагогика көллиятенең “Прометей” клубы әгъзалары анда ел саен барачаклар.
— Сугышка киткәндә һәр кеше бәлки исән калырмын дигән өмет белән киткән, — диде хәрби хезмәт ветераннар комитеты җитәкчесе Рафаэль Мөхәммәтҗанов. — Без аларны үзебезнең хәтердә яшәтергә бурычлы.
Хәтер һәм кайгы көненә багышланган чараны “Бердәм Россия” партиясенең җирле бүлекчәсе башкарма комитеты, партиянең “Яшь гвардиячеләре” эчтәлекле, мәгънәле итеп әзерләгән. Шунда ук “Дөньяга — тынычлык!” дигән акция оештырылган иде. Теләгән һәркем тынычлык һәм сугышка карата мөнәсәбәтен тасмага язып, “Тынычлык һәм игелек” агачы ботагына бәйләп куйды.
Соңыннан “Президент белән бергә” иҗтимагый хәрәкәте әгъзалары “Хәтер” дип аталган велосипедта узышуда катнаштылар.
Ильяс Фәттахов