Юлга чыксаң, аек бул

Юлга чыксаң, аек бул
Июнь аенда да юл хәрәкәте кагыйдәләрен бозучылар, исерек килеш руль артына утыручылар шактый. Өч атнада гына да 404 очрак теркәлгән.
Иң күбесе – тизлекне арттыручылар (146 очрак). 67сендә куркынычсызлык каешы такмаган, 16сында балаларын махсус креслосыз йөрткән, 17сендә тиешле урында җәяүлеләргә юл бирмәгән өчен беркетмә төзелгән. 15 очракта җәяүлеләр үзләре юл хәрәкәте кагыйдәләрен бозган. 8 кеше спиртлы эчемлек кулланган килеш руль артына утырып юлга чыккан.
– Берсенең бөтенләй транспорт йөртү хокукы биргән таныклыгы юк, – ди ЮХИДИнең Арча бүлекчәсе хезмәткәре Инсаф Павлов. – Шулай да исерек хәлдә трактор йөртергә булган. Бу “кыюлыгы” 10 тәүлеккә арест белән тәмамланды. Калганнарына 30 мең сум штраф түләргә, ел ярымнан ике елга кадәр машина йөртү хокукын биргән таныклыксыз калырга туры киләчәк.
Июнь аенда 32 юл–транспорт һәлакәте булган. Шуларның алтысы кешеләргә зыян килү белән тәмамланган. Июньдә Теләче юлында (Божа янындагы борылышта) “Ниссан” һәм “ВАЗ–2014” автомобильләре бәрелешә. Нәтиҗәдә, “ВАЗ–2114” машинасын йөртүче авыр тән җәрәхәтләре ала.
8 июньдә Чулпан заправкасы янында кызу тизлек белән барган “Киа Сет” автомобиле идарәне югалта һәм кырыйга авып, әйләнә. Рульдәге хатын–кыз хастаханәгә эләгә.
14 июньдә Казан урамы чатындагы тукталышта 3 яшьлек баланы машина бәрдерә. Машинада утырып калган бала аннан чыга да юлның икенче ягында торган әтисе янына йөгерә. Нәтиҗәдә, зыян күрә.
18 июньдә чистарту корылмасы янында юл һәлакәте була, “Деу–Матиз” автомобиле “КамАЗ”га бәрелә, рульдәге хатын–кыз тән җәрәхәтләре ала.
20 июньдә “Татнефть” заправкасын үтеп, Казан ягына барганда күпер янында башта “Богдан” һәм “Тойота” машиналары бәрелешә, аннан шул “Тойота” тагын тракторга да килеп бәрелә.
21 июньдә Мөндештә Иске Кырлай ягыннан килгән “Хундай Солярис” машинасы юл кырыена төшә, пассажиры тән җәрәхәтләре ала.
Гөлсинә Зәкиева