Сезнең белән горурланабыз

Сезнең белән горурланабыз
23 июнь район тарихына кабатланмас мизгелләре белән кереп калачак. Бу көнне Арчаның “Йолдызлар аллеясе”ндә тагын ике йолдыз пәйда булды.
2009 елда ачылып, инде 15кә җыелган йолдызлар янәшәсенә Арчаның 2нче мәктәбен тәмамлаучы Гөлүсә Галиева белән Ашытбаш мәктәбенең чыгарылыш сыйныф укучысы Айсинә Әүхәдиеваның исемнәре дә өстәлде.
Кечкенәдән егетләргә хас булган спорт төре – бокс белән шөгыльләнүче Гөлүсә күптән түгел халыкара класслы спорт остасы дәрәҗәсенә лаек булды. Республика, Россия, Европа дәрәҗәсендәге, халыкара турнирда җиңүләр яулаган сәләтле укучы. Ярышларда катнашып, дәресләрне күп калдырырга туры килсә дә, аңа һәрвакыт ярдәм иткәннәре өчен мәктәп коллективына, сыйныф җитәкчесенә һәм бар көчен куеп шөгыльләнгән тренеры — әтисе Марат Галиевка рәхмәтле булуын җиткерә ул.
Айсинә дә тырышларның тырышы — татар теле һәм әдәбияты буенча Халыкара олимпиада призчысы, инглиз теле буенча Бөтенроссия Яшьләр чемпионатының федераль җиңүчесе. Киләчәген дә ана теле белгечлеге белән бәйләргә хыяллана Айсинә.
Ашытбаш мәктәбе коллективы сәләтле укучылары белән ихластан горурланды бу көнне. Илүзә Фәхретдинованың “Елның иң яхшы укучысы” исеменә лаек булуы үзе өчен генә түгел, укытучылары өчен дә көтелмәгән булды. Аеруча сыйныф җитәкчесе — мәктәпнең рус теле һәм әдәбияты укытучысы Зөлфия Фәхретдинова өчен. Укытучы укучысы Айсинә өчен бер куанса, кызы Илүзә өчен күз яшьләрен тыеп кала алмады.
—Авыл мәктәбенә бу кадәр игътибар булыр, укучыларыбызның уңышы шәһәрнекеләр дәрәҗәсеннән дә узар дип уйламаган идем. Бик тырыш, сәләтле сыйныф иде бу чыгарылыш. Мәктәпнең олимпиадаларда яулаган уңышларының 50 проценты безнең сыйныфның тырышлыгы булды. Бүген бу тантанада 5 медаль яулаган укучыбыз катнаша, — дип шатлыгын уртаклашты ул.
Тантанада укуда алдынгы булулары белән беррәттән, районның мәдәни, спорт, иҗади тормышында актив катнашып уңышлар яулаган укучылар белән бергә 33 укучы–медаль ияләре катнашты. Район күләмендә тантаналы шартларда район башкарма комитеты җитәкчесе Илшат Нуриев, район мәгариф идарәсе җитәкчесе Зөлфәт Дәүләтбаев, мәдәният идарәсе җитәкчесе Рамил Мөхетдинов, яшьләр эшләре, спорт һәм туризм бүлеге җитәкчесе Зиннур Сәгыйтов, Арчаның 1нче мәктәбе директоры Эльмира Сафина тарафыннан котлау ишетеп, рәхмәт хатлары, истәлек бүләкләре алу мизгелләре күңелләрендә үз урынын алыр. БДИ үткәндә калды, офыкта хыяллар, өметләр көтә. Һәм аларны — 4–6 елдан югары белем алып кайткан белгечләрне район көтә.
Кичә ахырында күңелдәге яшерен теләкләрне күккә ашырырга дип куллардагы шарлар һавага күтәрелде. Мәктәп елларының кабатланмас хатирәләренең соңгы битенә моңлы көй астында саубуллашу вальсы нокта куя...
Розалия Зиннәтова