Мәдәниятка караш уңай якка үзгәрә

Мәдәниятка караш уңай якка үзгәрә
Әңгәмәдәшебез — район мәдәният идарәсе җитәкчесе Рамил Мөхетдинов.
— Рамил Рафисович, райондагы мәдәният учреждениеләренең матди–техник базасы нинди хәлдә?
— Бер сүз белән әйтсәк, канәгатьләнерлек дип бәяләргә мөмкин. Районда 34 мәдәният йорты, 44 авыл клубы эшли. 6 авыл клубы начар хәлдә.
Республика программасы кысаларында соңгы елларда Арча шәһәренең көньягында, Сикертән, Симетбаш, Пөшәңгәр, Иске Иябаш авылларында яңа клублар төзелде. Башка мәдәният биналарында һәр елны, мөмкинлектән чыгып, күпмедер дәрәҗәдә төзекләндерү эшләре үткәрелә. 2014 елда Апаз мәдәният йорты ныклап төзекләндерелде. Быел Наласа мәдәният йорты яңартыла. Бу эш дәвам итәчәк. 2014 елда 2 млн. 406857 сумлык техник чаралар, аппаратура, җиһазлар, киемнәр, 35 мең сумлык музыка инструментлары алынды.
— Элегрәк авыл клуб- ларында эшләү өчен махсус белемле кадрлар җибәрелә иде. Хәзер бу мәсьәлә ничек хәл ителә?
— Барлык хезмәткәрләр — 256. Шуларның 31е — югары (шул исәптән авылларда — 17), 29ы — махсус урта белемле. Быел без авыл клублары өчен кадрлар әзерләү максатыннан Казанга укырга барырга чакырып мөрәҗәгать иткән идек. Кызганыч, теләк белдерүче булмады.
— Бәлки хезмәт хакы аз булгангадыр?
— Алай ук дип әйтмәс идем. Авылда эшләүче югары белемле хезмәткәрләребез айга 15–16 мең сум ала. Ә аның 7–8 мең сум гына булган вакытлары да бар иде.
— Районыбыз талантларга элек–электән бай булган. Арчалыларның бүгенге уңышлары да горурланырлык.
— Бездә сәләте булган һәр кеше аны тулы көчкә ача алсын өчен бөтен шартлар тудырылган. Районда 8 коллектив: “Арча егетләре”, “Ләйсән”, “Русская песня” вокаль ансамбльләре, “Җидегән чишмә” халык театры, халык инструментлары оркестры, Иске Ашыт мәдәният йорты, Сикертән мәдәният йорты театр коллективлары, Шишор мари халык ансамбле халык исемен йөртә. Ел саен үткәрелә торган Предприятие, учреждение, оешмалар көннәре дә талантларны ачарга, үстерергә ярдәм итә.
— Сикертән мәдәният йортын әйтеп үттегез. Аның эшеннән канәгать булмаучылар да бар икән. Бу турыда редакциягә дә шалтыратучылар булды, “Гөргери кияүләре” спектакле өчен бирелгән сертификатның күпме суммага икәне дә билгесез, диләр.
— Сикертән мәдәният йорты начар эшли дип әйтергә нигез юк. Анда балалар, яшүсмерләр өчен бию, балалар һәм өлкәннәр өчен драма, аерым җырлау, нәфис сүз берләшмәләре (түгәрәкләре), милли көрәшне яратучылар клубы эшли.
Әлеге берләшмәләрнең эш графигы элмә такталарда күрсәтелгән. Һәр берләшмәнең аерым журналы бар, район Мәдәният йорты аларның үтәлешен контрольдә тота.
Сикертән мәдәният йорты җырчылары, биючеләр иҗат концертларында, бәйрәмнәрдә чыгыш ясап тора. Быелгы иҗат концертында Сикертән кызы Адилә Салихова нәфис сүз буенча җиңү яулады.
Сертификат 8 мең сумлык булган. Аның акчасы театр коллективындагы 11 кешегә бүлеп бирелгән.
— Яшь талантлар үстерү максатында нинди чаралар үткәрелә? Сәхнә кос- тюмнары тектерүгә ярдәм күрсәтелмиме? Кварталга бер булса да балалар концерты оештырып булмыймы, дигән сораулар алдык.
— Яшь талантлар белән сәнгать мәктәбе дә, район Мәдәният йорты да шөгыльләнә. Алар район, республика, Россия күләмендәге конкурсларда, фестивальләрдә катнашалар. Быел шундый коллективлар өчен 300 мең сумлык киемнәр тектердек.
Балалар концертлары оештырылып тора, бәйрәмнәр, төрле чаралар, балалар катнашыннан башка үтми. Бу юнәлештә эшләүне дәвам итәчәкбез.
— Курса–Почмакта элекке клубның стеналары шул килеш, аны яңартып салып булмасмы икән, дип шалтыраттылар.
— Курса–Почмак авылында бүген генә клуб салып булыр, дип әйтә алмыйм. Бәлки киләчәктә республика программасына керер дип өметләнсәк кенә инде. Ә авылда элекке мәдәният йорты бинасында ял итү, спорт белән шөгыльләнү, төрле чаралар үткәрү өчен бөтен мөмкинлекләр бар.
Ильяс Фәттахов