Һәркем үзеннән башласын

Һәркем үзеннән башласын
29 июньдә Арча муниципаль район башлыгы урынбасары Любовь Осина авыл җирлекләре башлыклары белән киңәшмә үткәрде.
Анда Саба районы ветеринария инспекторы Л.Сабиров, Арча районы җир һәм милек мөнәсәбәтләре палатасы җитәкчесе И.Сираҗиев, авыл хуҗалыгы һәм азык–төлек идарәсенең баш белгече М.Абдуллин, Арча район Советы аппараты җитәкчесе Р.Галимуллин катнашты.
Киңәшмәдә кабаттан район территориясендәге биотермик чокырлар һәм себер түләмәсе үләт базларына кагылышлы мәсьәлә каралды. Булган 51 биотермик чокырның – 11е, 82 себер түләмәсе үләт базларының 11е ветеринария законнары таләп-ләренә туры килми.
Бары тик җирле үзидарә органнары көче белән генә биологик калдыкларны юк итү, терлек авыруларын кисәтү һәм бетерү, аларны дәвалау, кешеләр һәм хайваннар өчен уртак булган авырулардан саклау буенча уңай нәтиҗәләргә ирешеп булачак. Монда халыкның да, җитәкчеләрнең дә җаваплы каравы кирәк.
Бүгенге көндә янгыннарга каршы көрәш мөһим мәсьәлә булып кала. Янгынны сүндерүгә караганда булдырмавы җиңелрәк. Шуңа күрә профилактика эше бик мөһим. Авыл җирлекләре башлыклары янгын часте белгечләре белән йорт саен кереп аңлату эшләре алып баралар, инструктаж үткәрәләр.
Һәр авылда су алу урыны булдырырга кирәк. Хуҗасыз, тузган биналарны юк итү дә янгын куркынычын киметә. Авыл җирлекләре башлыклары аларны үз белдекләре белән сүтә алмый. Мондый очракларда әлеге корылмаларда электр утын, газны өзү буенча эш алып барылырга тиеш.
Милек һәм җир мөнәсәбәтләре палатасы җитәкчесе И.Сираҗиев күп балалы гаиләләргә йорт төзү өчен җир участоклары бирү мәсьәләләренә тукталды. Киләчәктә мондый гаиләләргә җир участоклары алар яшәгән авыл җирлекләре территорияләрендә биреләчәк.
Авыл хуҗалыгы һәм азык–төлек идарәсенең баш белгече М.Абдуллин мөгезле эре терлек асраучы шәхси хуҗалыкларга дәүләт ярдәме программалары белән таныштырды.
Сөт тапшырган өчен халыкка акчаны вакытында түләү мәсьәләсе дә күтәрелде. Бүгенге көндә сөтне сатып алу бәясе 12 сумнан да ким булмаска тиеш. Безнең районда бу күрсәткеч республикада иң түбәне.
Үзара салым акчалары җыю буенча актив эш алып барыла. Аның ни өчен кирәклеген халыкка әйбәтләп аңлатырга.
Авыл эчләрендәге территорияләрне төзекләндерү мәсьәләсе дә бик мөһим. Һәр кеше моны үзеннән башларга тиеш: капка төбен тәртипкә китерергә, үләнен чабарга һ.б.