Нократ Аланында Сабантуй гөрләде

Нократ Аланында Сабантуй гөрләде
Арчалылар бәйрәм итә дә, үткәрә дә белә. Үзебездә генә түгел, чит төбәкләргә чыгып та. Узган атнада алар Нократ Аланына барып, Сабантуй уздыруда ярдәм күрсәтте. Бу беренче ел гына түгел, традициягә әйләнеп бара. Безнең Арча ягы үзешчәннәрен анда халык та белә, көтеп ала.
Бу юлы да алар концерт куйган мәйданчык янын шунда ук әйләндереп алып, ахырга кадәр татар җырын, моңын тыңлап хозурландылар.
– Нократ Аланында Сабантуй 26нчы тапкыр үткәрелә. Моңарчы районныкы гына булса, быел өлкәнеке итеп оештырылды. Нократ Аланы шәһәре белән районда 20 мең татар яши. Район, шәһәр хакимияте тарафыннан татарларга караш бик яхшы. Зур–зур татар авылларыбыз бар. Һәрберсендә Сабантуйлар үткәрелә. Урта Шөн авылында кичке Сабантуй да була. Моннан тыш Нәүрүз бәйрәмен, “Уйнагыз, гармуннар”, татар җыры бәйгеләрен, татар теле буенча олимпиадалар оештырабыз. Татар иҗтимагый оешмасы җитәкчесе Әлфия Сабирова Сосновкада “Идел” татар җыры ансамблен алып бара. Ул шулай ук татар теле буенча өстәмә дәресләр дә бирә. Сосновка, Нократ Аланы, Кызыл Алан мәктәпләрендә берәр татар төркеме бар. Татарстан Республикасының Мәгариф һәм фән министрлыгы булыша, бушка әсбаплар бирә. Авылларда, шәһәрләрдә мәчетләр эшләп килә, – ди Киров өлкәсе татарлары төбәкара мәдәни–мәгърифәтчелек оешмасы рәисе Рәүф Фәсхетдинов. – Ерак юлны якын итеп килеп, безгә Сабантуй бәйрәме үткәрүдә булышканнары өчен Арча районы хакимиятенә, халкына зур рәхмәт.
Нократ Аланы Сабантуенда беренче тапкыр гына катнашуыбыз түгел. Әмма быел ул аеруча киң колач алган. Аны ачу тантанасында кунаклар да күп катнашты. Нократ Аланы шәһәр башлыгы Сергей Кисляков халыкны милли бәйрәм белән котлады, Арча районы җитәкчесе Илшат Нуриев Татарстан Республикасы Президенты Рөстәм Миңнехановның котлавын җиткерде, истәлеккә бүләк тапшырды. Нократ мөфтие Зөфәр хәзрәт тә халыкка теләкләрен ирештерде.
Бәйрәмне арчалылар башлап җибәрде. Милли киемнәрдән Зилә Шәйхетдинова җитәкчелегендәге “Ләйсән” халык җыр, Аида Сәләхетдинова җитәкләгән “Аллегро” бию коллективлары чыккач, мәйданга чәчәкләр сибелгән кебек булды. Аларның чыгышын күз дә алмый карадылар. Аннан милли киемнәр кигән кызларыбыз Сабантуй кунакларын һәм халыкны чәкчәкләр белән сыйлады. Уеннар, күңел ачулар, ярышлар, көрәш башланып китте. Читтә ат чабышы, мотоциклда, мопедларда узышулар булды. Төрле аттракционнар, уеннар, кече сәхнәләрдә концертлар мәйданнан читтә дә адым саен иде.
Арчалылар һәр тарафта беренчеләр сафында булды. “Казан арты” тарих–этнография музее алып килгән тарихи экспонатлар да, кул эшләре осталары 5нче гимназия, 2нче мәктәп укытучылары Әлфия Сабирова, Гөлназ Ибраһимованың чиккән түбәтәйләре, 7нче мәктәптән Альбина Зыятдинованың мөселман яулыклары, калфаклары, педагогика көллиятеннән Фәридә Гайнетдинованың тәмле исле сабыннары, сәнгать мәктәбеннән Нияз Миннемуллинның агач эшләнмәләре, Иске Кырлайдан Гөлназ Хәбибуллинаның сәйләннән ясалган гөлләре, шуралыларның махсус станокта чыпта сугулары һәркемдә соклану уятты. Көрәштә дә безнекеләр башлап йөрде дисәк, ялгыш булмас. Гер дә күтәрделәр, кул да көрәштерделәр, көрәштеләр дә. Ә Арча Мәдәният йорты үзешчәннәре – “Рус җыры” (җитәкчесе Фирая Батыршина), “Ләйсән” халык ансамбльләре, “Аллегро” бию коллективы, җырчылар Гөлназ Җәләлетдинова, Рисәлә Әхмәтханова, Сөмбел Заһидуллина, Данис Гайфуллин, Зөһрә Шәрәфетдинова, Халидә Әхмәдиева, Рәсим Низамиев, Расих Галимҗанов, Дамир Гасыймов, гармунчылар Рәдис Харисов, Вагыйз Әһлиуллин һәм башкалар көне буе, кичке бишкә кадәр концерт куйдылар.
Гөлсинә Зәкиева