Хуҗасыз пляж

Хуҗасыз пляж
Эссе көннәрдә су коенып калырга тырышабыз. Күпләр Көтек буасын үз итә. Бу юлы без дә, балалар белән, 2014 елда грант откан Көтек буасындагы “Казансу” халык пляжына барырга булдык.
Алдагы көнне генә киртә белән тотып алынган әлеге пляжга кермичә, аның янәшәсендә коенган идек. Төбе пычрак сулык коенырга барыбер дә хәтәр, бигрәк тә балаларга. Ә менә яңа пляждагы комлыктан әкрен генә суга кереп китүләре уңайлы. Аерата балалар өчен. Рәхәтләндек су коенып. Монысы өчен рәхмәт.
Пляж ерактан ук үзенең каланчасы, чишенү–киенү корылмалары, комы белән күзгә ташлана. Юнылмаган киртәләр белән (экзотика!) әйләндереп алынган ул. Дөрес, беренче карашка пляж зәвыклы ял итү урынын түгел, ә бәлки ташландык комлыкны хәтерләтә. Кояштан каплау максатыннан агачтан эшләнгән зонтиклары (өсте калай) ауган, сәхнәсыман ике зур такта корылманың да пляжга нигә кирәген аңлап булмый, кайберәүләр аның кырыена басып аяк юа, икенчеләр сузылып яткан. Каланчасы, чишенү–киенү корылмалары, бәдрәфенә сүз тидереп булмый, культурный итеп эшләгәннәр.
Грант акчасына эшләнгән пляж язмышына битараф калып булмый. Район башкарма комитеты икътисад бүлеге җитәкчесе Зөлфәт Шәрәфетдинов белән элемтәгә кердек.
— Узган ел “Казансу” халык пляжы социаль проекты җиңеп, 580 мең сумлык грант оттык, — дип сөйләде ул. — Пляжны “Жилкомбытсервис” ширкәте, урман хуҗалыгы, Сабиров фермер хуҗалыгы эшләде. Чыннан да, аны зәвыклы ял итү урынына әверелдерәсе бар. Моңа тотыначакбыз.
Арча урман хуҗалыгы участок җитәкчесе Вәккас Зиатдиновтан:
— Пляжга сездән нинди өлеш керде? — дип сорыйм.
— Кичә балалар, кыргый пляжда су коенып кайттык, дип көләләр. Ә бит без аны матур итеп эшләгән идек. Эшләп бетергәч, я, Хода, районда уңайлы бер пляж булды, дип сокланып карап торган идек. Ике бәдрәф, суга керү юлларын, пристаньны (аны төпкә беркеттек), аннан суга төшү баскычларын ясадык. “Жилкомбытсервис” та каты эшләде, ярларны кисте, су төбен чистартты, ком ташыды, каланчаны, чишенү–киенү корылмаларын торгызды. Коймага тимер баганалар утыртты. Пляжга күз–колак булып торырга хуҗа кирәк.
— Үземнең дә эчем поша ул пляж өчен, — ди коймаларын тоткан хуҗалык җитәкчесе, фермер Айдар Сабиров.
“Жилкомбытсервис” ширкәте пляжда 574 мең 200 сумлык эш башкарган.
Проектта каралган барлык эшләр дә башкарылганмы соң? Без бу турыда буа төбе чистартылачак, яр буена, сулык төбенә ком җәеләчәк, коену урыннары калкавычлар белән әйләндереп алыначак, пляж кече архитектура формалары һәм санитария–гигиена әһәмиятендәге биналар белән җиһазландырылачак, дип язып та чыккан идек. Проектның әһәмиятле бер пункты үтәлмәгән (әллә үтәлеп тә юкка чыкканмы!) — коену урынында калкавычлар юк.
Көтек буасында эшләнгән пляж су коеныр өчен әйбәт булган. Җаваплы кешене билгеләп, тәртиптә тотарга гына кирәк. Арчаның үзен дә пляжлы шәһәр итеп күрәсе килә. Халык шуны тели. Теләсә кайда су коену хәтәр дә.
Румия Надршина