Иске Масрада яңа пункт

Иске Масрада яңа пункт
Узган атнада Иске Масра авылында истәлекле вакыйга булды – биредә республикабызда эшләп килүче максатчан программа буенча төзелгән модульле фельдшер–акушерлык пункты файдалануга тапшырылды. Тантанада Татарстан Республикасы сәламәтлек саклау министры Гадел Вафин, Арча районы җитәкчесе Илшат Нуриев катнашты.
Куанычлы вакыйганы күрергә авыл халкының олысы–кечесе җыелган. Һәркемнең йөзендә шатлык балкый. Авыл урамыннан килүче өлкән пар белән сөйләшеп киттек. Иске фельдшерлык пунктының каршысында гына яшәүче Минневәсилә белән Рәфыйкъ Галимҗановлар икән.
— И, кызым, тормышның рәхәтлеге, Аллага шөкер. Яшәсәк иде әле, — дип сөйләп китте Минневәсилә апа. — Яңа медпункт ачасыларын ишеткәч, авылыбыз бетми, шөкер, дип сөенеп туймадык. Фельдшер Алсуыбыз безнең табибә. Авырып китеп чакыртсаң, тәүлекнең теләсә кайсы вакытында килә. Өч чакрымдагы Югары Мас- рада яшәсәләр дә, ире белән килеп җитәләр. Ире бик булыша үзенә. Авырмаганда ике көн саен үзе хәлне белеп тора. Яшьләр күп булмаса да, авылда өлкәннәр шактый. Клуб мөдиребез Чулпан Һадиева төрле кичәләр оештыра, Казаннан концертлар чакырта.
Иске Масрада инде өч дистә елга якын фельдшер булып Алсу Габдрахманова эшли, өч авылга хезмәт күрсәтә. Заманында тирә–якта танылган фельдшер Радия Ибәтуллинаның кул астында тәҗрибә туплаган. Үз эшенә фидакарьләрчә бирелгән, хезмәтен намус белән яратып башкаручы фельдшердан авыл халкы да бик канәгать. Ә бу бина алар өчен күктән иңгән шатлык сыман булды. Чөнки, авылның нигезен тәшкил итүче өлкәннәр еш атлап керә аның бусагасын. Искесендә кышларын салкын иде, дип сөйлиләр.
Тантанада катнашучы кунаклар авыл халкының авырмыйча, сәламәт булып яшәүләрен, әлеге бинага профилактика, очрашып хәл–әхвәлләр белешү өчен генә килүләрен теләде.
— Шушындый уңайлы бина булгач, район үзәк хастаханәсенең белгечләре хәзер бирегә килеп хезмәт күрсәтә алачак. Авыл халкы өчен зур ярдәм бу, – диде Гадел Вафин.
Район җитәкчесе Илшат Нуриев халык турында шундый кайгыртучанлык күрсәткән өчен республика Президенты Рөстәм Миңнехановка рәхмәт әйтте, авыл кешеләренә бәхетле тормыш теләде. Ул медпунктның элекке бинасы да буш тормаячагын әйтте. Анда балалар бакчасы ачу турында сөйләшү булды. Балалары булган авылның киләчәге бар.
Розалия Зиннәтова