Дәүләт ярдәм итәргә әзер

Дәүләт ярдәм итәргә әзер
Безнең сорауларга район башкарма комитетының икътисад һәм финанс бүлеге җитәкчесе Зөлфәт Шәрәфетдинов җавап бирә.
— Хәзерге вакытта сәнәгать мәйданчыкларындагы эшмәкәрләргә дәүләт ярдәме турында әйтеп үтсәгез иде.
— Җиһазлар алу өчен чыгымнарның 50 проценты күләмендә субсидия бирелә. Сәнәгать мәйданчыгының күчемсез милкен сатып алу чыгымнарының 25 процентына (5 миллион сумнан артык түгел), сәнәгать мәйданчыгы күчемсез милкен арендалау чыгымнарының 25 процентына кадәр кире кайтару каралган. Лизинг килешүе буенча җиһазлар алу чыгымнары 50 процентка кадәр, кредитлар буенча процентлар түләү чыгымнары, энергия саклау, энергетик аудит үткәрү һәм энергия саклау челтәренә тоташтыру субсидияләнә.
Сәнәгать мәйданчыкларындагы эшмәкәрләр өчен җиһазлар бәясенең 50 процентын кире кайтару буенча конкурсны 2015 ел августында башлау планлаштырыла. Җиһазларны милеккә алу килешүенә җайланмалар, механизмнар, станоклар, приборлар, аппаратлар, агрегатлар, чаралар һәм технологияләр керә ала.
“Лизинг–грант – 2015” программасының икенче этабы август, сентябрьдә башлануы көтелә. Хәзердән үк конкурс шартлары нигезендә гариза бирергә әзерләнергә кирәк. Лизинг–грант лизингка алына торган җиһазларны субсидияләүгә керә.
– Крестьян–фермер хуҗалыклары, гаилә фермалары нинди ярдәмгә исәп тота ала?
– 2015 елның 24 июненнән 13 июльгә кадәр “2015 – 2017 елларга Татарстан Республикасында башлаучы фермерларга ярдәм” программасының 2нче этабында катнашу өчен крестьян–фермер хуҗалыкларын конкурска сайлап алуда катнашуга гаризалар кабул ителә.
Дәүләт ярдәме сөт терлекчелеге, мөгезле эре терлек симертү, атчылык, сарыкчылык, кәҗә асрау, дуңгызчылык, авыл хуҗалыгы кошларын (күркә, үрдәк, тавык, каз) үрчетү, бөртекле һәм бөртекле–кузаклы культуралар, азык культуралары, бәрәңге игү, яшелчәчелек, җиләк–җимеш культуралары үстерү юнәлеш- ләрендә күрсәтеләчәк.
Июль–август айларында “Гаилә фермаларына ярдәм” программасы буенча конкурсның 2нче этабы планлаштырыла. Шуңа күрә эшләүче крестьян–фермер хуҗалыкларына кирәкле документларны әзерләү шарт.
Шулай ук бизнес–идеяләр һәм бизнес–планнар конкурсы дәвам итә. Аларның максаты – яшьләрне иҗади, фәнни һәм инновацион эшчәнлеккә тарту, Арча муниципаль районында яшьләр эшмәкәрлеген үстерү.
Конкурста югары уку йортлары студентлары, аспирантлар, яшь белгечләр һәм башлаучы эшмәкәрләр катнаша ала. Проектларны аерым кешеләр дә, күмәк рәвештә дә эшләргә мөмкин.
Бизнес–проектларны төзү өчен кирәкле документлар Арча муниципаль районы рәсми сайтының “Программалар, проектлар, конкурслар” бүлегендә урнаштырылган.
Гаризалар кабул итү һәм аларны бәяләү 2015 елның 1 сентябренә кадәр башкарыла. Гамәлдәге программалар буенча эшмәкәрлеккә ярдәм турында тулырак мәгълүмат алу өчен Арча муниципаль районы башкарма комитетының икътисад һәм финанс бүлегенә мөрәҗәгать итәргә яки 3–06–44 телефоны буенча шалтыратырга була.
Шуны да әйтәсе килә, безнең районның бер шәхси эшмәкәре Икътисад министрлыгында сәнәгать мәйданчыгы сыйфатында дәүләт теркәве алды. Анда эшләргә теләүчеләр 3–06–44, 3–21–72 телефоннары буенча шалтыратсыннар.