Сыерыңны бетерергә ашыкма

Сыерыңны бетерергә ашыкма
Ашытбаштан бер хатын–кыз шалтыратты, июнь аенда сөт бәясе 8 сумга кала дип сөйлиләр, сыер асрап ятудан ни мәгънә, ди.
Кеше ышанмас сүзне чын булса да сөйләмә, диләр. Авыл җирлекләре башлыклары, сөт җыючыларның кайберләре белән сөйләшеп чыктым – мондый бәя турында ишеткәннәре юк икән. Әмма июнь аенда шәхси хуҗалыкларга сөт өчен күпме түләячәкләрен берәү дә белми. Чөнки Арча сөт комбинаты безнең район халкына болай да күрше районнарныкыннан кимрәк түли. Аннан, тапшырган сөтнең һәр көн бәясен исәпләп баралар да, ай беткәч, уртача бәя чыгаралар. Шулай итеп, сөт бәясе ай буе сер булып кала.
Район җитәкчесе Илшат Нуриев киңәшмәдә һәркемгә аңлаешлы итеп әйтте: Арча районында халыкка сөт өчен күрше районнарныкыннан ким түләнергә тиеш түгел! Июнь аенда сөтнең литрына 12 сум түләү таләбе куелды.
Республика Президенты, Авыл хуҗалыгы һәм азык–төлек министрлыгы халыкка сыерларны күбрәк асрарга куша, кыенлыкларга карамастан, ярдәм итү юллары таба.
– 2015 елда шәхси хуҗалык- ларга бер савым сыерга – 3 мең, бер кәҗәгә 1 мең сум исәбеннән акчалата ярдәм күрсәтеләчәк, – ди район авыл хуҗалыгы һәм азык–төлек идарәсенең финанс–икътисад бүлеге җитәкчесе Марат Абдуллин. – Сыер һәм кәҗәләр авыл җирлекләрендәге хуҗалык кенәгәләрендә теркәлгән булырга тиеш.
Быел шәхси ярдәмче хуҗа- лыклар тана сатып алганда бер танага 15 мең сум исәбеннән субсидия биреләчәк. Бер хуҗалык 5 тана сатып алу хокукына ия. Әмма аларны аерым кешеләрдән түгел, ә авыл хуҗалыгы предприятиеләреннән сатып алырга кирәк булачак. Ярдәмче хуҗалык әлеге таналарны кимендә 5 ел асрарга бурычлы.
Тагын бер яңалык – сыер асрау өчен кечкенә ферма төзүче шәхси ярдәмче хуҗалыкларга 200 мең сум кире кайтарылмый торган субсидия бирелә. Шәхси хуҗалык моңа кадәр кимендә 3 сыер асраган булырга тиеш. Кечкенә ферманың кимендә 8 сыерга исәпләнгән булуы шарт. Төзелеш 2015 елда башланган булырга тиеш.
Шәхси ярдәмче хуҗалык әлеге субсидияне алу өчен авыл җирлегенә мөрәҗәгать итә, анда нинди документлар кирәклеген әйбәтләп аңлатачаклар.
Әйбәт, күңелле яңалыклар. Мондый кайгыртучанлык булганда сөт бәясе белән дә шаярырга урын калдырмаслар. Ә субсидияләр турында тулырак мәгълүматларны район авыл хуҗалыгы һәм азык–төлек идарәсенең финанс–икътисад бүлегенә 3–13–66 номеры белән шалтыратып белә аласыз.
Ильяс Фәттахов