Музейдан – армиягә

Арча һәм Әтнә районнары егетләре хәрби бурычларын үтәргә китте. 1 июльдә аларны Советлар Союзы Герое Гани Сафиуллинның Иске Кишет авылындагы музее каршында, аның тууына 110 еллыкка багышланган чарада, тантаналы рәвештә озату булды.
Үзләренә фатыйха биреп, хәерле сәфәр, исән–имин кайтуларын теләп, Рәмис хәзрәт Гарифуллин тарафыннан укылган дога, хезмәт иткән дәверләрендә егетләрнең сакчы фәрештәсе булыр, иншалла. Армиягә китүчеләрне дога белән озату районда күптән матур гадәткә әйләнде. Ә музейда булып, каһарманның батырлыклары турында мәгълүмат алу армиягә китүчеләр өчен тәүге тапкыр. Егетләр биредә Арча ЗУЭСы җитәкчесе Рөстәм Гомәров сөйләвеннән геройның батырлыклары, тормыш юлы турында белде. “Хезмәт иткән чакта иптәшләрегезгә легендар якташыбыз, аның батырлыклары турында сөйләгез, — дип киңәш итте Рөстәм Кәлимулла улы егетләргә. — Минем хыялым — армиягә китүче һәр егет монда килеп музейны карап китсен, үзенә үрнәк алсын иде”.
– Армиягә китәсе егетләрне районда һәрвакыт тантаналы шартларда югары дәрәҗәдә озату оештырыла. Киләчәктә озату кичәләрен биредә, батырлар рухында үткәрергә планлаштырабыз. Егетләр батыр якташлары турында белеп, горурланып хезмәт итсен, – диде ТР хәрби комиссариатының Арча һәм Әтнә районнары буенча бүлеге җитәкчесе Алмаз Борһанов.
Герой якташың булу һәркем өчен горурлык. Тарихи бина сафка бас-кач, авыл халкы да куанган. Бу хакта күптән түгел 90 яшен тутыр- ган Мөнәвәрә Сафина да әйтте. Мөнәвәрә апаның Гани Сафиуллин белән аралашканы да булган икән. “Бервакыт Казанның Бауман урамындагы кибет каршында авылдашымны очраттым. Ул бер озын буйлы кеше белән сөйләшеп тора. Мин яннарына баргач, кем булуым белән кызыксынды. Ә Кишет кызы икәнлегемне белгәч, бөтенләй ачылып китеп, якын туганын күргән сыман шатланды, авылдашлар турында җентекләп сораша башлады. Аннан үзенең Гани Сафиуллин икәнлеген әйтеп, Казандагы адресын биреп, кунакка чакырып калды. Соңрак аның үзен авылга мәктәпкә чакырдылар. Ә Гани абый якын итеп мәктәпкә мине дә дәште. Шул чакта тагын бер рәхәтләнеп сөйләшеп утырган идек. Иске Кишетнең фәрештәсе, дияр идем мин аны. Чөнки ул авылны җанландырды, безгә никадәр көч бирде.”
Музей өчен мәгълүмат туплау- да авыл китапханәчесе Гөлфия Габитованың хезмәте зур. Китап- ханәче булып эшли башлаганнан, батыр авылдашы турында ныклап эзләнә ул. Гани абыйның оныклары белән элемтә булдыра. Гөлфия ханым шушы музейның җаваплы кешесе: үзе мөдир, экскурсияләр алып баручы, үзе җыештыручы, бакчасын карап торучы һ.б. Кызу көннәрдә музей территориясендәге паркка утыртылган 70кә якын агачка Илдар Сибгатуллин белән бергәләп су сипкәннәр. Илдар шәхси тракторы белән су ташып торган. Күптән түгел ачылса да, музей бусагасын атлап үтүчеләр шактыйга җыелган инде. “Тирә–яктагы авыллардан, Әтнә районныннан укучылар күп килә. Атна саен ераклардан кунакка кайтучылар да музейны күреп китә. Сабантуй вакытларында килүчеләр күп булды. 22 июньдә авыл халкы, мәктәп коллективы белән берлектә Хәтер көне уздырдык. Аңа кадәр мәчеткә йөрүчеләр җыелышып Коръән укыган иде. Музейны күрергә теләүчеләр рәхим итсеннәр, кайчан килсәләр дә ишекләребез ачык. Минем телефон номеры музейның капкасына язылган (89276702767), китапханәдә эш сәгатем бетмәгән чак булса, шалтыратуга киләм”, — ди Гөлфия ханым.
Армиягә китүчеләр арасында Яңа Кишет егете Рәнис Галимҗанов та бар иде. Инде шактый тормыш тәҗрибәсе туплап, аграр университетны тәмамлап китә. “Армия мәктәбен үтүче һәркемгә исән–имин хезмәт итеп кайтуларын телим. Безне олы тормышка әзерләп үстергәннәре өчен әти–әниләргә, патриотик рухта тәрбияләгәннәре өчен укытучыларга, район җитәкчелегенә рәхмәт, — ди ул. — Аларның ышанычын намус белән акларбыз”.
Розалия Зиннәтова