Арча буйлап–велосипедта

Арча буйлап–велосипедта
Арча үзәгендә төркем–төркем велосипедчыларны күрү узып баручыларга хәзер сәер тоелмый да. Чөнки һәр айның беренче көнендә велосипедларга утырып, шәһәр урамнарын (3 километр 800 метр ара) әйләнү матур гадәткә әверелеп бара. Айга бер көн булса да, машинадан төшеп, ике тәгәрмәчле транспортка утыру – сәламәт яшәү рәвешен пропагандалау ул. Беренче июль көнне булганы Халыкара олимпия көненә багышланды.
– Барыбыз да велосипедларга! дип исемләнгән акциядә теләге булган һәркем катнаша ала, – диде район башкарма комитеты эшләр идарәчесе Рамил Гарифҗанов. – Вакыты, сәгате алдан радио, газета аша хәбәр ителәчәк.
Беренчесендә балалар күбрәк булса, бу юлы өлкән яшьтәгеләр дә велосипедка утырган. Мәдәният йорты, халыкны социаль яклау бүлеге, почта бүлекчәсе хезмәткәрләре, мәктәпләрдән укытучылар да килгән.
– Безнең оешмадан 5 кеше чыкты, – ди Мәрхәмәтлек үзәге җитәкчесе урынбасары Роза Хисамова. – Безнең төп максатларыбызның берсе дә сәламәт яшәү рәвешен пропагандалау бит. Бүген шуны үз үрнәгебездә күрсәтергә булдык.
– Велосипедка утырып юлга чыгучылар юл хәрәкәте кагыйдәләре турында да онытмасыннар иде, – ди ЮХИДИнең Арча бүлекчәсе дәүләт инспекторы Ринат Хөснетдинов. – Велосипедтагылар җәяүлеләр өчен билгеләнгән махсус юл аркылы чыгу урынында велосипедтан төшәргә тиеш. Тротуар булмаган очракта, машина юлыннан берәр–берәр, бөтен юл хәрәкәте кагыйдәләрен үтәп йөрергә кирәк. Транспорт белән идарә итүчеләр дә велосипедтагыларга җәяүлеләргә караган кебек карарга тиеш.
Ниһаять, тиешле араны үтеп, юлчылар кабат үзәккә килеп тә җитте. Ярыш булмаса да, бишесе күпкә алда иде.
– Беренче булып бара идем, карыйм, ике кыз мине узарга тырыша. Яшьләргә ничек юл бирмисең инде, – диде шаяртып Арча халык театры режиссеры Рафис Сәләхетдинов.
Өлкәннәрнең күбесенә яшь чакларын искә төшереп, велосипедта йөрү ошаган. Кайберләре өчен ул көндәлек хәрәкәт чыганагы да икән.
– 10 ел гына да түгелдер инде, мин көн дә эшкә велосипед белән йөрим. Бензин кирәкми, саф һава, сәламәтлеккә файдасы бик зур. Бер ияләшкәч, бик җайлы, – ди халыкны социаль яклау бүлегеннән Ислам Закиров.
– Мин халыкны социаль яклау бүлегендә социаль хезмәткәр булып эшлим, өйләренә барып, өлкәннәргә ярдәм күрсәтәм. Велосипед минем өчен менә дигән транспорт. Җәй буе аннан төшмим, – ди Зәйтүнә Заһидуллина да.
Ул көнне үзәктән бар да кулларына истәлек бүләге дә алып, велосипедларына утырып көр күңел белән таралды.
Гөлсинә Зәкиева