Әниләр киңәше бик кирәк

Әниләр киңәше бик кирәк
Татарстанда “Әниләр киңәше” дигән проект старт алды. Аны “Бердәм Россия” сәяси партиясенең төбәк бүлеге оештырды. Нәтиҗә чыгарганнан соң, хәтта “Әниләр киңәш бирә” дигән махсус вымпел – сыйфат билгесе тапшыру да планлаштырыла.
Бу билгене балалар тәрбияләүгә, аларның сәламәтлегенә кагылышлы мәсьәләләрне өйрәнгәннән соң, бу өлкәдә экспертлар ролен үтәгән чын белгечләр – әниләр куячак. Чөнки әниләрнең игътибарлы күзләре генә балаларга куркыныч тудырган һәр нәрсәне бик тиз күреп ала, һәр тарафта аларны сакларга, якларга тырыша. “Әниләр киңәше” проекты төрле өлкәләрдә эшләүче, күп балалы яки тәрбиягә бала алып үстерүче, танылган яки бик үк таныш та булмаган аналарны берләштерә.
Әлеге проект безнең районда да старт алды. Җәйге каникул чорында күпчелек балаларның лагерьларда булуын искә алып, “Бердәм Россия” сәяси партиясенең җирле бүлекчәсе эшне шулардагы яшәү шартларын тикшерүдән башларга булды. Балаларын җәйге лагерьларга җибәргән аналарның ышанычлары акланамы, балалар анда үзләрен иркен һәм уңайлы сизәме?
Шуны ачыклау һәм балаларга бервакытта да зыян итми торган әниләр киңәшен бирү һәм тыңлау өчен Сеҗедәге “Шатлык” лагерена юл тоттык. Моны җирле бүлекчә җитәкчесе Тәлгать Җәләлетдинов, аның урынбасары Валентина Гаранина оештырды.
Биредә лагерь беренче елын гына эшләми. Стационар лагерь да түгел ул, мәктәп бинасында урнашкан. Әмма ял итүчеләргә биредә бик ошый. Балалар белән эш тәҗрибәсе булган вожатыйлар, тәрбиячеләр лагерь тормышын тулыландыру, күңелле һәм кызыклы итү өчен бөтен тырышлыкларын куялар, белемнәрен, тәҗрибәләрен файдаланалар.
– Безнең тәрбиячеләр Яңа Кенәр балалар иҗат йорты хезмәткәрләре булса, вожатыйлар Арча Укучылар сарае каршында эшләп килүче “XXIнче гасыр яшьләре” клубына йөрүчеләр. Яшьләр фантазиягә бай, балалар белән бик тиз уртак тел табалар, төрле чаралар оештыралар. Спорт белән шөгыльләнергә теләүчеләр өчен дә шартлар җитәрлек. Музыка салонында гитарада уйнап җырларга өйрәнәләр. Кул эшләрен дә үзләштерәләр, – ди өлкән вожатый, Яңа Кенәр балалар иҗат йорты өстәмә белем бирү педагогы Илфат Галимҗанов.
Лагерьда үткәрелгән һәр чараны санап бетерерлек түгел. Әниләр өчен иң мөһиме – балаларга рәхәт һәм кызык. Тамаклары тук. Биш тапкыр туклану оештырылган. Йокы бүлмәләре иркен, чиста, якты, уңайлы. Бернәрсә дә балалар сәламәтлегенә куркыныч тудырмый. Арча үзәк хастаханәсеннән килгән шәфкать туташы тәүлек буе шунда. Ризыкларның сыйфаты, чисталык һәрчак контрольдә. Без булганда да санэпидемстанция вәкиле тикшерү белән килгән иде.
–Янгын куркынычсызлыгы буенча да бар да тәртиптә, – диде янгын күзәтчелеге бүлеге инспекторы Илшат Мәхмүтов. – Электр үткәргечләр, янгын сигнализациясе тикшерелде, янгын сүндерү инвентарьлары, су бар. 29 июнь лагерьда янгын күзәтчелеге бүлеге һәм янгын сүндерү часте янгын куркынычсызлыгы буенча чара үткәрде. Балалар плакатлар ясадылар, уеннар, эстафеталар булды. Янгын сүндерү машинасы белән барган идек. Шунда ничек янгын сүндергәнне күрсәттек, балалар киемнәребезне киеп карадылар. Үзләренә истәлекле бүләкләр дә тапшырдык. Соңыннан вожатыйлар белән инструктаж булды, янгын вакытында ничек бинадан чыгуны күрсәтү максатыннан эвакуация оештырып карадык.
“Әни киңәше” бирергә ул көнне Арчаның җиденче мәктәбе директоры Альмира Гатауллина килгән иде. Ул 39 ел педагогик хезмәт стажы булган укытучы да, җитәкче дә, ана да. Һәр минуты санаулы, эше күп булса да, Альмира Гатауллина балалар янында бөтен дөньясын онытып, алар белән аралаша. Бу юлы да ял итүче малайлар һәм кызлар аны тын да алмыйча тыңлады. Мәктәп директоры бу юлы җитәкче генә түгел, ә ана буларак, аларга үзенең киңәшләрен бирде, үзе, балачак хыяллары, мәктәбе, уңышлары, мәктәп музее эше, укучыларның ничек эзтабарлар булып китүләре, нинди уңышларга ирешүләре турында сөйләде.
– Хыялсыз кеше булмый, хыялланыгыз һәм киләчәктә шул хыялларыгыз тормышка да ашсын. Өлкәннәрне ихтирам итегез, актив булыгыз, аралашып яшәгез, сөйләшергә өйрәнегез, – диде ул балаларга киңәш итеп.
Әни генә түгел, ике оныкка дәү әни дә булган Валентина Гаранинаның да әйтер киңәшләре бар иде. “Күп укыгыз. Уку хәтерне яхшырта, белемне арттыра, рухи яктан үстерә. Көчле шәхесләр булып үсегез. Көчлеләрнең төп коралы – изгелек. Ә изгелек җирдә ятмый. Актив булыгыз. Шуларны үтәсәгез, барысын эшләргә дә өлгерәсез”, – диде ул.
Гөлсинә Зәкиева