Авылларның йөзе үзгәрә

Авылларның йөзе үзгәрә
Өчилегә кергәндә балкып утырган мәктәп, аның янәшәсендәге яңа медпункт биналары ерактан ук игътибарны үзенә тарта. Авылның йөзен үзгәрткән, ямь керткән әлеге биналар республика Президенты Программалары белән бәйле.
Фельдшер–акушерлык пункты 2013 елда ачылган иде. Ә мәктәп быел ныклап төзекләндерелде, ачу тантанасында катнашкан ТР Премьер-министры урынбасары, мәгариф һәм фән министры Энгель Фәттахов аны нәкъ яңа мәктәп кебек булган, дип бәяләде.
Балкып утырган мәктәп янына җыйналган укучылар, укытучылар, ата-аналарның да йөзләре шатлыклы, бәхетле бүген.
– Без моның өчен республикабыз Президентына бик рәхмәтле, – диде тантанадагы тәбрикләү сүзендә муниципаль район җитәкчесе Илшат Нуриев.
Районда утыздан артык Программа тормышка ашырыла, аларның һәркайсы халыкка уңай шартлар тудыруны күздә тота. Яңартылган мәктәп балалар белән тулы булсын, алар ныклы белем алсын.
Татарстан Республикасы Премьер–министры урынбасары, мәгариф һәм фән министры Энгель Фәттахов Арча районында мәгариф өлкәсенә һәрвакыт зур игътибар бирелүен билгеләп үтте.
– Мин узган ел да, менә быел да ныклап төзекләндерелгән мәктәпләрне ачарга иң беренче сезнең районга килдем, – диде ул. – Без сезне башкаларга үрнәк итеп куябыз, сезнең районда мәктәп ремонтына тотынганнар икән, кул тимәгән бернәрсә дә калмый. Мөмкинлеген дә, акчасын да табалар. Һәркайда да алай түгел бу.
Министр 2016 елда мәктәпләрне төзекләндерү төгәлләнәчәген әйтте. Быел балалар бакчаларын төзекләндерү программасы эшли башлады. Шулай ук урта махсус уку йортларына (элеккеге СПТУлар) игътибар артачак. Бала 9нчы сыйныфны бетергәндә үзенә нинди һөнәр кирәклеген ачыклап чыгарга тиеш. Эшче һөнәрләр бик дәрәҗәле хәзер, мәсәлән, яхшы эретеп ябыштыручы айга 100 мең сум хезмәт хакы ала.
– Мондый мәктәптә бала начар укый алмый инде, – диде Энгель Фәттахов “Арча КСМы” ширкәте төзүчеләре осталыгына югары бәя биреп. – Арчалылар, гомумән, начар эшләргә күнекмәгән. Чөнки бу Тукай ватаны, Өчиле дә Тукай исеме белән бәйле.
Яңа Кишет мәктәбе үзе дә яңарган, ишегалдына асфальт җәелгән. Монда да “Арча КСМы” ширкәте коллективы тырышкан, алар хезмәтенә Энгель Фәттахов та, Илшат Нуриев та югары бәя бирделәр. Советлар Союзы Герое Гани Сафиуллин исеме белән бәйле мәктәп бу. Укытучылар яхшы әзерлекле, укучылары район, республика күләмендә җиңүләр яулый.
– Укытучылар әзерләүгә нык игътибар бирәчәкбез, – диде Энгель Фәттахов. – Очраклы кеше укытучы булуга барып җитәргә тиеш түгел.
Энгель Фәттахов Иске Кишеттә Гани Сафиуллин музеенда, Яңа Кырлай урта мәктәбендә дә булды.
Ильяс Фәттахов